Udalerriaren egoera aztertzeko inkesta kaleratu du Lekeitioko Udalak
Lekeitioko Udala, udal plangintzan eta hirigintzan, genero-ikuspegia integratze lanean dabil. Lanak 2018an garatuko dituzte, HAPO berriaren izapideekin batera.
«Herria diseinatu eta zehazteko bestelako faktoreak ere kontuan hartu beharko dira, hala nola, aniztasun funtzionala duten pertsonak (mugikortasun urria, itsutasuna, etab.), menpekotasuna duten pertsonak, adin nagusikoak, umeak, etab., eta guzti hau generoari buruzko gogoeta batetik eginez. Honi Hirigintza Inklusiboa deritzogu», azaldu dute
Iritzia batzeko. Arlo horri lotuta beraz, udalerriaren egungo egoera aztertzeko helburuagaz, herritarren iritzia ezagutzea oso garrantzitsua dela azaldu du udalak. Horretarako, HAPO hirigintza inklusiboari buruzko galdetegia egitera gonbidatu dituzte herritarrak. «Herritarren iritzia ezagutzea garrantzitsua da herriko segurtasuna, mugikortasuna, irisgarritasuna, ekipamenduak eta zerbitzuak, espazio libreak edota sinbolismoaren inguruko gaietan», esan dute.
Hori dela eta, lanaren baitan, hainbat ekintza burutuko dituzte herritarrek parte hartu ahal izateko, beste batzuen artean elkarrizketak eta inkestak. Nahi duenak, gainera, inkesta horiek udaletxean bete ahalko ditu, edo bestela webgune edo sare sozialen bidez.
