67 taldek parte hartuko dute VII. Lea-Artibai Rallyan

Eider Mugartegi

Amoroto,Aulesti,Berriatua,Etxebarria,Gizaburuaga,Ispaster,Lekeitio,Markina-Xemein,Mendexa,Munitibar,Ondarroa,Ziortza-Bolibar

2018/04/26

Dena prest dago Lea-Artibaiko automobilismo ekitaldi nagusiari hasiera emateko. Komisarioen batzarrak egin zituzten atzo [apirilak 25] eta egiaztapen tekniko eta administratiboak egiteko eguna izango da biharkoa [apirilak 27] parte hartzaileentzat lehian hasi orduko. Guztira, 67 autok zeharkatuko dituzte aurten Lea-Artibaiko errepide eta baserri bideak VII. Lea-Artibai Rallyan. Egun bakarra izango dute aurten autoari zuku guztia ateratzeko. Denboraz neurtutako tarte guztiak zapatuan [apirilak 28] osatu beharko dituzte goiz goizetik hasi eta ilundu arte, 07:30ean hasi eta 20:02 ingurura arte hain zuzen.

Alex Maguregi markina-xemeindarrak eta Ander Txakartegi berriatuarrak Lea-Artibaiko Rallyan parte hartuko dute aurten ere.

Domekan [apirilak 22] izan zuten partaideek entrenamendu eguna, eta aurtengo lau tarteak probatzeko eta xehetasun guztiak jasotzeko aukera eduki zuten. Rallyaren antolatzaile Kastinparro Racing taldekoek azaldu zutenez, ez zen ezelako arazorik egon, eta partaideek trafiko arauak behar bezala bete zituzten. “Nahi adina kilometro izango dituzte pilotuek rally egunean azkar joateko”. Euskal Herriko Rally Txapelketari hasiera emango dion proban egongo dira iazko irabazleak Aingeru Castro eta Alaitz Urkiola, bai eta automobilismo munduko aurpegi ezagun asko ere. Sailkapenaren borrokan ez dira faltako Lea-Artibai eta Busturialdeko pilotu eta kopilotuak, 21 autotan joango dira bertokoak. Beste batzuren artean, proban egongo dira Mikel Bilbao pilotu earra (Renault Clio Williams), Txus Jaio eta Jesus Urkidi markinarrak (Bmw 325 E30), Gorka Antxustegi eta Xabat Urresti markinarrak (Suzuki Swift), Aitor Saizar eta Mireia Saizar berriatuarrak (Renault Clio Sport), Ivan Muñoz eta Hodei Madariaga gernikarrak (Citroen C2 R2 Max), Garikoitz Lopez Etxebarriko pilotua eta Urko Pagoaga kopilotu markinarra (Citroen Saxo 16v), Jon Erezuma aulestiarra eta Julen Bilbao munitibartarra (BMW M3 E30), Ioritz Odiaga aulestiarra eta Iker Mintegia munitibartarra (Renault Megane), Oihane Uranga kopilotu markina-xemeindarra (Honda Civic Type R), Aitor Rocha eta Beñat Gezuraga lekeitiarrak (Renault Clio Williams), Oihan Erkiaga berriatuarra eta Bernat Iraolagoitia markina-xemeindarra (Citroen Xsara VTS), Ion Ugaldebere kopilotu gernikarra (Abarth Punto Evo), Ander Txakartegi berriatuarra eta Alex Maguregi markina-xemeindarra (Citroen Saxo VTS 16v), Xabat Arrate markina-xemeindarra eta Kaiet Bereziartua etxebarritarra (Citroen Saxo VTS 16v), Egoitz de Luis eta Gonzalo San Jose gernikarrak (Citroen Saxo VTS 16v), Edu Gartzia-Salazar pilotu ondarrutarra (Citroen Saxo Vts 16v), Lorea Revuelta kopilotu lekeitiarra (Citroen Saxo Vts 16v), Jose Jabier Aginaga pilotu markina-xemeindarra (Ford Escort MK I), Enrike Saizar berriatuarra eta Julen Aranzeta lekeitiarra (Ford Escort MK II), Anartz Arrieta eta Iñigo Ugalde gernikarrak (BMW 325i E 36), Ibai Zumalakarregi eta Ibai Ajuriagoikoa gernikarrak (BMW 318 IS). Parte hartzaile guztien emaitzak uneoro jarraitu ahalko dira. Denborak sarean jarriko dituzte ikusgai, Fotomotor-en orrian. HONEKIN LOTUTA: VII. Lea-Artibai Rallyko tarteak iragarri ditu Kastinparrok