Tximistakoek emaitza onak eta dominak lortu dituzte Euskadiko Txapelketan
Asteburuan Durangoko pista irekian lehiatu dute Euskadiko Txapelketa. Lekeitioko Tximista Atletismo Taldekoak sei dominagaz bueltatu dira etxera, eta horrez gain, markak hobetzea lortu dute.
18 urtez azpikoetan eta 20 urtez azpikoetan lehiatu dira. 18 urtez azpikoetan, Aiora Agirregomezkortak urrezko medaila irabazi du, 800 metrotan, eta 1.500 metrotan eta xabalina jaurtiketan, berriz, zilarrezkoa. Maila berean, Oihane Gonzalez pisu jaurtiketako Euskadiko txapeldunorde geratu da. Irati Iriondok brontzezko domina lortu du 200 metroko proban (18 urtez azpikoetan).
Era berean, 20 urtez azpikoen 400 metro leunetan, brontzea irabazi du Naiara Virtok.
Gainera, Agirregomezkortak eta Iriondok euren markak hobetuta, Espainiako Txapelketarako gutxieneko denborak eskuratu dituzte. Agirregomezkortak 800m eta 1.500m probetako marka pertsonalak hobetu ditu; 800m-koan 2:22.77 marka, eta 1.500 m-koan 4:57.07 egin zituen. Iriondok 100m eta 200m-koetan hobetu ditu bere denborak. Lehenengoan, haize indartsuari aurre eginda, 12.57 egin zuen, eta bigarrenean, 26.18.
Espainiako Txapelketa Xixonen (Asturias, Espainia) lehiatuko dute ekainaren amaieran.
Tximistako arduradunek lortutako emaitza onengatik zoriondu dituzte.
aioraagirregomezkorta 2
