Arrakastatsua izan da Mutrikun egin duten ardiei ilea mozteko erakustaldia

2018/06/09

Iragarrita zegoen moduan, 11:00ak puntuan jaitsi dira Goienetxe baserriko ardiak Goiko Plazatik Beheko Plazara. Hitzorduak ikusmina sortu du, eta ordu horretarako Goiko Plazan nahikoa jende zegoen, batez ere umeak. Erdikokaletik pasatu dira ardiak, eta Beheko Plazara ailegatu eta gero, ilea nola mozten zieten ikusteko erakustaldia hasi da. Ardiei ilea mozten dien Ipar Arrinda profesionala izan da azalpen guzti-guztiak eman dituena, bai eta herritarren galderak erantzun dituena. Hala, garai honetan ilea moztea izaten dela ohikoena esan du. “Ardi batzuei urtean bi aldiz mozten zaie ilea; beste batzuei, aldiz, behin”. Ilea mozteko tresneriaren gorabeherak azaldu eta gero, ilea mozteko teknika ere pausoz pauso azaldu du. Hori bai, argi utzi du ilea mozterakoan ardiak ez duela sufritzen.

[zuzenean ARGAZKI GALERIAra JOAN]

Azalpenetan gauza bitxiak ere kontatu ditu. Esaterako, ardiei ilea mozten dietenek esku leunak edukitzen dituztela esan du. “Ardien ileak dituen propietateetako batek leuntasuna ematen du”. Halaber, ilea moztu eta gero ardien usaina aldatu egiten dela esan du. “Beraz, ilea moztu eta minutu gutxira normala izaten da artaldean borroka txikiak gertatzea; hierarkia berriro ezarri behar izaten da”. Gaur egun artilea ez dela asko erabiltzen esan du, eta nahi zuenak artilea etxera eraman ahal zuela esan du. “Asko jota, artzainak besarkada emango dizue”. Ile-mozketa hain da teknikoa ze, artilea pieza bakar baten geratzen da.

Ardiei ilea mozteko erakustaldia, Mutrikun

Erlazionatutako edukiaARGAZKI GALERIA: Ardiei ilea mozteko erakustaldia, Mutrikun