BEREZIA Bi positibo berri erregistratu dituzte Mutrikun

Berriatuko San Pedro jaiak, ekintzaz bete

2018/06/28

Herritarrek herritarrentzako prestatutako jaiak. Horrelakoxeak dira Berriatuko San Pedro jaiak. Eguenean [ekainak 28] hasita, ekintzak uztailaren 8ra arte luzatuko dira. Iazko jaietan egin legez, aurten ere adin guztientzako jaiak prestatu dituzte. Eguenean [ekainak 28], esaterako, San Pedro bezpera eta San Pedro Txiki Eguna ospatu zituzten. «Txikien eguna aurreratu egin genuen, Ondarroako Zapato Azulagaz bat ez egiteko». Hala, herriko umeak izan ziren atzokoan protagonista. Goizetan jolasetan ibili eta gero, herriko txikienek herri bazkaria egin zuten. Iaz eguraldi txarra egin zuen, eta bazkaria frontoian egin behar izan zuten. Aurten, baina, plazako arkupean egin dute bazkaria. Eta urtero modura, Anaitasuna jubilatuen elkartekoak izan ziren zerbitzariak. Jakitera eman dutenez, 50 ume inguru batu ziren bazkaltzen.

[zuzenean ARGAZKI GALERIA ikusi]

Bazkalostean ere giroa izan zen nagusi plazan; umeek eta gaztetxoek ondo baino hobeto pasatu zuten puzgarrietan, ohe elastikoetan eta bits festan. Egunarekin amaitzeo txokolate jana eta D’Caprichoren kontzertua egon ziren.

[EGITARAUA]

Barikuan [ekainak 29] kirola eta antzerkia izango dira protagonista. Alde batetik, Markina-Xemein Esku Pelota taldearen eskutik, txikien, gazteen eta nagusien partiduak egongo dira ikusgai. Eta, iluntzean, ATX Teatroaren Kale gorrian kale antzerkiagaz gozatu ahal izango da. Emanaldia adin guztietako herritarrei zuzenduta dagoela aurreratu dute. «Ikuskizunak etxe barik geratzekotan dagoen aitona-amona bikote baten gorabeherak kontatzen ditu. Protagonistak berrogei urtez bizi izan dira etxe horretan, auzo horretan, eta ezkondu ondoren erosi zuten pisua betirako uzteko unea iritsi den eguna irudikatuko dute».

[zuzenean ARGAZKI GALERIA ikusi]

Lagun arteko triatloiak eta kuadrillen arteko entsalada eta tortilla txapelketak girotuko du zapatua [ekainak 30]. Horretan ere nahikoa herritar biltzen direla aurreratu dute. «Ondarroan Zapato Azule denez, askok berton bazkaldu eta ondoko herrira joateko aprobetxatzen dute», azaldu dute. Dena dela, ekintzak ez dira faltako herrian geratzen direnentzako ere.

[EGITARAUA]

Adinekoek ere euren eguna edukiko dute, betiko legez, domekan. Egun horretan Anaitasuna herriko jubilatuen elkartekoak izan dira eguneko protagonista nagusiak. Jaietan egun guztiak izango dira bereziak, eta azkena eguna ere ez da gutxiago izango. Hala, zesta-puntak Berriatuan daukan indarraren erakusle izango da egun hori. Egun horretan Mendibarren frontoia izango da plaza nagusia. Beste behin ere, berriatuarrek jaiak antolatzeko eta jaietan ondo pasatzeko duten gaitasuna erakutsi dute.

Erlazionatutako edukiaARGAZKI GALERIA: Berriatuko San Pedro Txiki eguna

Lea-Artibai eta Mutrikuko albisteak euskaraz, libre eta kalitatez jaso nahi dituzu? Horretarako zure babesa ezinbestekoa dugu. Egin zaitez HITZAkide! Zure ekarpenari esker, euskaratik eginda dagoen tokiko informazio profesionala garatzen eta indartzen lagunduko duzu.

Egin HITZAkide

Iruzkinen atala