20. Atletismo Eguna ospatuko dute Markina-Xemeinen
Adin guztietako atletak batuko ditu zapatuan [uztailak 7], Markina-Xemeingo Zelaian 20. Atletismo Egunak. Urtero modura, ume eta gaztetxoen abiadura probekin hasi eta Herri Krosagaz amaituko da Markina-Xemeingo Atletismo Taldeak eta Bekobenta Eskolak antolatutako kirol ekitaldia.
17:00etan hasita, 60 metro, 100 metro eta 600 metroko abiadura probak eta erreleboak egingo dituzte txupete, aurrebenjamin, benjamin, alebin, txiki eta kadete mailetako atletek Zelaiaren inguruan.
Abiadura probekin amaituta krosak hartuko du txanda. Bi kilometrotako kros txikia egingo dute lehenengo 13-14 urteko txikien mailako atletek eta 16-17 urtetako kadeteek. 18:30ean hasiko dira herrian zehar aringa-aringa. Zelaitik irten eta Arretxinagaraino joango dira Xemeindik igarota, eta berriro Xemeinera itzulita Uhagon aurretik beherantz joko dute Zelaiko helmugaraino.
16 urtetik gorakoentzako Herri Krosa 19:00etan hasiko da, eta guztira, 7,8 kilometro edukiko ditu ibilbideak. Zelaitik irten eta San Agustin kalean zehar Xemeinerantz abiatuko dira korrikalariak. Lea Artibai Ikastetxearen ondotik Arretxinagarantz joango dira eta Barroeta futbol zelaiaren ondotik igarota, Beko Benta kaletik Bolurantz hartuko dute bide gorritik Atxondo kiroldegiraino jarraitzeko. Kiroldegiari buelta eman eta Ibaibarreneta aurretik Frai Bartolome kalerantz abiatu eta Goiko Portalera sartuko dira, Zelaira ailegatzeko. Ibilbide hori guztia bi bider egin beharko dute korrikalariek Zelaiko helmugan sartu orduko.
Herri Krosa amaituta banatuko dituzte sariak Zelaian bertan. Bestalde, Atletismo Eguneko probetan parte hartu nahi dutenek norbere proba baino ordu erdi lehenagora arte edukiko dute izena emateko aukera. Hala ere, abiadura probetan zein krosean parte hartuko duten Markina-Xemeingo bizilagun guztiei izena goizean emateko eskaera egin diete antolatzaileek.
17. Atletismo Eguneko Herri Krosa.
