Aitzol Etxaburu Artetxe preso ondarrutarra hurreratu egin dute
HITZAk gaur jakin ahal izan duenez, preso ondarrutarra Clairvaix-eko (Frantzia) espetxetik Mont de Marsan-eko (Frantzia) espetxera aldatu zuten atzo gauean [uztailak 4]; senideak gaur goizean [uztailak 5] jakin dute. Lehen Ondarroatik 1.028 kilometrora zegoen, eta orain, leku aldaketagaz, 206 kilometrora dago. Senideek ere ez dakite askoz gehiago. “Dakiguna da hurreratu egin dutela, eta hori poztekoa da. Lehen 1.028 kilometrora zegoen, eta orain 2 ordu eta erditan edo hiru ordutan bertan egoteko moduan gaude”.
Etxaburuk euro bateko deia egin ahal izan duela ere esan dute senideek. “Euro batekin Frantziatik Euskal Herrira deitzea ezebeza da, telefonoa hartzeak ia-ia euro bat balio du eta”. Dena dela, eta oraindik gauzak argi-argi ez badituzte ere, bisitak egiterakoan zailago edukiko dutela uste dute. “Lehen goizez eta arratsaldez bisitatu ahal genuen, baina orain, uste dugunaren arabera, bakarrik bi orduko bisitak jaso ahal ditu. Frantziako espetxe bakoitzak ezberdin funtzionatzen du bisitekin”.
Halaber, Etxaburuk Euskal Herrira hurreratzeko eskaera eginda zeukala esan dute senideek, Euskal Preso Politikoen Kolektiboak eztabaida hasi zuenetik. Eta Frantziak euskal presoak Euskal Herrira hurreratzen hasteko erabakia hartu zuenetik Etxaburu hurreratzen duten hamabosgarrena edo da.
Zortzi urtetan laugarren espetxea. 2009ko abuztuan Alpeetan atxilotu zuten, eta 2015era arte Fleury-Merogis-eko (Frantzia) espetxean egon zen behin-behineko espetxealdian. 2015eko ekainean Clairvaix-eko (Frantzia) espetxera lekualdatu zuten. Bada, atzo gauetik, Mont de Marsan-eko espetxean dago.
Aitzol Etxaburu Artetxe.
