Bolatoki berria daukate Markina-Xemeinen
Bola jokoan jokatzeko aukera egongo da aurtengo Karmen jaietan Markina-Xemeingo herrigunean. Zaletasuna bultzatu asmoz, eskualdeko bolariak elkartu eta Markina-Xemeingo 3 Txirlo taldea eratu dute, eta bolatoki bat prestatu dute Uhagon kulturgunearen atzeko partean dagoen hormaren ondoan.
Markina-Xemein eta eskualdeko herritarren artean zaletasuna badagoela diote. «Horren erakusle dira esate baterako Amallo, Santutxu, Barinaga, Gorozika, Iruzubieta, Zeinka eta Santa Eufemin dauden bolatokiak eta euretan egiten diren norgehiagokak». Baina Gipuzkoan ez bezala, Bizkaian jaietako txapelketez gain ezer finkorik ez dagoela dio MX3T taldeak, eta Gipuzkoan bizirik mantendu den ohitura biziberritu nahi dute Bizkaian ere.
Bola jokoa suspertzeko, baina, bolatoki baten premia ikusten dute herrigunean bertan. «Gure nagusiak Iruzubietako bolatokira joan izan dira entrenatzera, eta ondo etorriko litzaken eskaintza bat dela uste dugu. Antzina Markina-Xemeinen bi bolatoki zeuden, bata Etxano inguruan eta bestea liburutegi ostean; hala oroitzen dute nagusiek».
Beraz, Markina-Xemeingo Udalera jo zuten eskari horregaz, eta jaietarako bolatokia prestatzeko baimena jasota bolatoki bat eraiki dute auzolanean. «Ahal izan dugun gastu txikiena eraginez eta lana guk eginda eraiki dugu bolatokia. Pista prest, bola biraka jartzea besterik ez da falta».
Kokapen egokia. Kulturgune ondoa leku aproposa begitandu zaie MX3T taldekoei. «Herritarren eskura dago eta kulturgune baten ondoan, izan ere kirola eta kultura uztartzen ditu jokoak, orain dela 500 urteko idatzietan ageri den kirola da». Azaldu dutenez, gainera, Markina-Xemeinen dago inguruetako bola egile bakarra: Lauzirika baserriko Antonio Ibarluzea. «Hemen bueltan jokatzen diren bola denak bereak dira. Artista bat da, arta egurragaz egiten ditu bolak eskuz landuta».
Lauzirikak egindako bola erabiliko dute aurten lehenengoz, Karmen Egunean jokatuko den lehen txapelketan. Txapelketa hori jada martxan dagoen Bizkaiko 29. Hiru Txirlo Bola Joko Txapelketaren baitan kokatzen da. Mallabiko Goitian eta Markina-Xemeingo Amallo eta Barinaga auzoetan jokatu dira jardunaldiak orain arte, eta hurrengoa Markina-Xemeingoa izango da.
Bestalde, aurreratu dutenez, txapelketagaz gain, beste egun batzuetan ere tiraldiak egiteko aukera egongo da:
Uhagon osteko bolatoki berria. Argazkia MX3T
Bolatokia prestatzen. Argazkia: MX3T
- Uztailaren 13an 18:00etan.
- Uztailaren 14an, 18:30ean.
- Uztailaren 15ean, 19:00etan.
- Uztailaren 16an, 16:00etan, txapelketa hasi baino aurretik.
