Iaz baino herritar gehiagok parte hartuko dute aurten Berriatuko Bizilagunak egitasmoan
Bizikidetza eta elkarkidetza oinarri dituen egitasmoaren helburua Euskal Herriko familia eta pertsonak atzerritik etorritakoekin bazkari baten biltzea da, elkar ezagutuz edota harremanak sendotuz.
Iaz egin zuten lehenengoz Berriatuan, eta aurten iazko familia bikoitzak eman du izena. Hain zuzen, zortzi bazkari egingo dituzte domekan [azaroak 11]. Horietan berriatuarrak eta senegaldarrak elkartuko dira. Hala, etxe bakoitzean dinamizatzaile bana edukiko dute. “Iazko esperientzia oso positiboki baloratu zuen jendeak, eta horren adierazle da aurten parte hartuko dutenetatik lau iazkoak izatea. Espero dugu datorren urterako jende gehiago animatzea, egun polita izaten da eta”.
13:00etan udalerriko plazan batuko dira, musikaz lagunduta. Solasaldian talde argazkia ere aterako dute, eta 14:00ak aldera etxeetara abiatuko dira. “Egun osoko plana da; iaz ere giro polita sortu zen bazkalostean”.
Berriatuan ez eze, Gipuzkoako hainbat herritan ere egun berean egingo dute bat familiek. Izan ere, berriatuarrak Gipuzkoako Bizilagunak elkartekoekin daude harremanetan, eta beraz, denek domeka honetan egingo dituzte bazkariak.
Azaldu dutenez, parte hartzaile guztiak beste egun batean elkartuko dira berriro ere Berriatuan. Iaz egin modura, topaketa horretan diplomak banatuko dituzte, eta egitasmoaren eguneko esperientziak elkarbanatuko dituzte: “Bazkarietako argazkiak ikusi eta eguna zelan joan zen kontatzeko momentua izaten da”.
2012tik. Bizilagunak egitasmoa duela sei urte egin zuten estreinakoz Euskal Herriko hainbat udalerritan. Ordutik, 10.000 herritar inguruk parte hartu dute, dinamizatzaileak barne. Iaz, esaterako, 2.000 baino gehiago izan ziren txoko ugaritan mahai baten inguruan bazkaritarako elkartu ziren bertako eta atzerritar jatorriko familiak.
Egitasmoa parte hartzen dutenak elkarrekin jai giroan biltzeko, Bizilagunak Zirkus festa egin zuten Donostiako Sagues auzoan, urriaren 28an. Kulturaniztasunaren adibide da aipatu jaia, eta bertan bildutako herritarrek tailerrak eta bestelako ekintzak egin zituzten, eta bazkari erraldoi bat izan zuten.
Iaz egitasmoan parte hartu zutenak. Argazkia: Bizilagunak Berritxu.
