Hormaetxeak eta Aimarrek irabazi dute elite mailako Berriatuko 32. Desanexio Txapelketa
Zapatuan [azaroak 17] Mendibarren frontoia bete-bete egin zela esan dute Berritxu Zesta Eskolako kideek. Eta ez zen gutxiagorako ere, izan ere, 17:00etan hasita, 32. Desanexio Txapelketako (VIII. Luis Bilbao Memoriala) finalak jokatu ziren. Elite mailako partidua estu-estu egon zen, eta azkenean Hormaetxeak eta Aimarrek mendean hartu zituzten Erkiaga eta Lekue (30-29). “Finalak oso onak izan dira, eta zaleen erantzuna oraindik ere hobea”, esan dute Berritxu Zesta Eskolako kideek.
Lehenengo mailan Coxmek eta Manzik irabazi zuten; 30-21 emaitzagaz azpitxapeldun geratu ziren Gaizka eta Andonegi. Bigarren mailan Alex eta Julen Goitia Unax eta Danelen aurrean nagusitu ziren (30-29). Azkenik, gazteetan Txomin eta Atain izan ziren nagusi, eta txapeldunorde geratu ziren Eñaut eta Luken (30-27).
Txapelketa amaituta, Berritxu Zesta Eskolako kideek eskerrak eman nahi izan dituzte. “Eskerrik asko eta zorionak pelotari, antolatzaile eta jarraitzaile danoi!”.
Lekue eta Erkiaga, elite mailako azpitapeldunak. Argazkia: Berritxu Zesta Eskola
Hormaetxea eta Aimar, elite mailako irabazleak, udal ordezkariekin. Argazkia: Berritxu Zesta Eskola
Txapelketan parte hartu duten puntista guztiak, Mendibarren frontoian. Argazkia: Berritxu Zesta Eskola
