Lander Odiaga markina-xemeindarra Bizkaiko bolari onena izendatu dute
Anjel Ibarluzea elgoibartarrak irabazi du Euskal Herriko 29. hiru Txirlo Bola Joko Txapelketa. 23 txirlo botata jantzi du txapela San Migel taldeko bolariak. Sailkapenaren aurrean ailegatu zen Ibarluzea San Migel auzoan bertan lehiatu zen azken tiraldira, eta ez zuen hutsik egin. Auzoko lau bolari geratu ziren lehen postuetan: Xabier Loiola izan zen irabazlea 7 txirlo botata, Unai Loiolak bigarren egin zuen 5 txirlo jota, Angel Ibarluzea sailkatu zen hirugarren 4 txirlo botata eta Javier Osoro laugarren gelditu zen 4 txirlogaz.
Lea-Artibaiko partaideek maila handia erakutsi dute Euskal Herriko norgehiagokan. Markina-Xemeingo Hiru Txirlo taldeko (MX3T) Olatz Jimenez izan da emakumeen arteko irabazlea eta Lander Odiagak laugarren egin du sailkapen orokorrean. Gainera, Bizkaiko bolari onena izendatu dute Odiaga, Bizkaiko eta Euskal Herriko txapelketa biak batuz txirlo gehien bota dituelako. MX3T taldea zoriondu egin dute betiko bolariek. “Gure kirolak aurten egin duen gorakadagatik eta garaikurren berezitasunagatik, gure kirolera pertsonalizatu ditugulako”, azaldu dute.
Elgetako Sebastian Aranzabal (19 txirlo) eta San Migelgo Unai Loiola (19 txirlo) izan dira sailkapen orokorrean bigarrena eta hirugarrena. Emakumeen artean, berriz, Asola Berriko Olaitz Rodriguez (7 txirlo) eta MX3T taldeko Nerea Jimenez (7 txirlo) geratu dira bigarren eta hirugarren.
Gainerako mailei dagokienez, gazte mailan, Udai Zelaia (Iruzubieta) izan da irabazlea; alebin mailan, Kepa Rodriguez (Asola Berri) eta benjaminetan, Josu Urkia (MX3T). Nagusiei dagokienez, Felix Gomez (Asola Berri) izan da onena 17 txirlo botata, Juan Luis Rodrigez (Asola Berri) eta Antonio Ibarluzea (Iruzubieta) geratu dira ondoren 16 eta 15 txirlogaz. Bikoteen kategorian, ostera, Xabier Loiola eta Angel Ibarluzea izan dira txapeldunak (41 txirlo); Asola Berri taldeko Felix Gomezek eta Beñat Gomezek (32 txirlo) eta MX3T taldeko Mikel Urkiak eta Lander Odiagak (31 txirlo) osatu dute bikotekako podiuma. Taldeetan, San Migel A nagusitu da, 89 txirlogaz; Mx3T Bk bigarren egin du (59 txirlo) eta Asola Berri Ak (52 txirlo) osatu du podiuma.
Guztira lau egunetan jokatu da Euskal Herriko txapelketa, eta parte hartze handia eduki du. Iruzubietan (Ziortza Bolibar) eman zioten hasiera eta San Joxepen (Bergara), Barinagan (Markina-Xemein) eta azkenik San Migelen (Elgoibar) elkartu dira bolariak, zeinek baino zeinek txirlo gehiago bota lehiatzeko. 68 bolarik parte hartu zuten Barinagako eta San Joxepeko saioetan, 65ek Iruzubietan eta 55 batu dira San Migelen.
Geldialdia egingo du orain bola jokoak, datorren urtera arte. 2019an 50 urte egingo ditu Gipuzkoako Txapelketak, eta Euskal Herrikoak 30 urte.
Lea-Artibaiko bolariak sariak hartuta. Argazkia: MX3T
