Xabat Galletebeitia lekeitiarra bigarren sailkatu da Berrizko finalaurrekoan
2018ko Bizkaiko Bertsolari Txapelketaren lehen finalaurrekoa lehiatu zuten Berrizko frontoian, domeka arratsaldean [azaroak 18]. Miren Amurizak etxean lortu zuen abenduaren 15eko finalerako txartela. Guztira 650 bertsozale elkartu ziren.
Berriztarrak 515,5 puntugaz irabazi zuen finalerdia. Galletebeitiak, ostera, 503,5 puntu eskuratu zituen. Aitor Bizkarra abadiñarra sailkatu zen hirugarren.
Agurren ostean, bikoteka, zortxiko nagusiko bertsoaldiekin hasi zuten saioa. Jarraian, zortziko txikian eta hamarreko txikian jardun ziren. Puntu erantzunen ostean, gai berdinari helduta bakarkako bertsoekin amaitu zuten puntuen lehia. Zortziko handian izan ezik, gainerakoetan Amurizak jaso zituen puntu gehien.
Hain zuzen, zortziko nagusian Galletebeitiak Julen Erezuma gernikarra izan zuen alboan, eta euren saioa izan zen epaimahaiaren ustez onena. Zortziko txikian Amurizagaz aritu zen, autobusean elkar ezagutzen den bikotearen paperan, eta hamarreko txikian, ostera, tokiko komunikabide bateko kazetaria izatea egokitu zitzaion, Unai Mendiburu alkatearen kexei erantzunez. Lekeitiarrak Alzheimerraren gaia landu zuen bakarkakoan, eta hortxe bildu zituen puntu gehien (118 puntu); 124 puntu eman zizkioten Amurizari bere bakarkakoan.
Ibarzabal, Igorren. Domeka honetan [azaroak 25] Igorren lehiatuko dute Bizkaiko Bertsolari Txapelketaren bigarren finalaurrekoa. Oholtzara igoko diren sei bertsolarien artean egongo da Nerea Ibarzabal markina-xemeindarra. Haregaz batera, Onintza Enbeita muxikarra, Oihana Bartra bilbotarra, Beñat Ugartetxea mallabiarra, Malen Amenabar larrabetzuarra eta Eneko Abasolo iurretarra lehiatuko dira.
LEHEN FINALAURREKOAREN SAILKAPENA
Amurizak irabazi zuen atzoko finalaurrekoa.
Argazkia: Bizkaiko Bertsozale Elkartea.
- Miren Amuriza Plaza 515,5 puntu
- Xabat Galletebetia Abaroa 503,5 puntu
- Aitor Bizkarra Ruiz 485,5 puntu
- Imanol Uria Albizuri 479 puntu
- Julen Erezuma Arzanegi 464,5 puntu
- Unai Mendiburu Valor 460 puntu
Galletebeitia, Berrizen. Argazkia: Bizkaiko Bertsozale Elkartea
