Ikuskizun bikaina eskaini dute Xisterako pilotariek Madrilen
Ikuskizun bikaina eskaini dute Xisterako pilotariek Madrilgo (Espainia) La Elipa pilotalekuan. Goiz eta arratsalde jardun zuten, zapatuan [azaroak 17], jokoan.
Madrilen “gustora” egon zirela jakitera eman dute pilotariek. Guztira 26 pilotari egon dira asteburuan La Elipan zesta erakustaldia ematen, tartean Lea-Artibai, Mutriku eta Busturialdekoak. Berriatuko Zesta Eskolako hiru: Maialen Aldazabal Aldazabal, Ihart Arakistain Muñoz eta Naia Calvo; Mutrikuko Danok Bat Zesta Eskolako lau: Eneritz Lizardi Azpiazu, Ane Elezgarai Usobiaga, Olatz Elezgarai Usobiaga eta Olaia Otaño Arrona; Ereño Jai Alaiko pilotari bat: Ziortza Landa Goiriena; eta Markina-Xemeingo Zesta-Punta Eskolako 11: Arai Lejardi Larrinaga, Burne Robles Larrinaga, Lur Lejardi Larrinaga, Erika Mugartegi Solozabal, Izaro Arbe Izagirre, Malen Nicolas Txurruka, Amaia Aldalur Txurruka, Izaro Fuentes Cañamares, Maddi Bereziartua Idoeta, Miren Idoeta Zamora eta Uzuri Etxaburu Urkidi.
Xisterako arduradunek jakinarazi dutenez, sei kiniela jokatu zituzten guztira, kategoria ezberdinetako pilotariek. Goizeko hiru kinieletan Malen Nicolas eta Miren Idoeta markina-xemeindarrak, Frida Watkins zumaiarra eta Erika Mugartegi markina-xemeindarra, eta Ihart Arakistain berriatuarra eta Eneritz Lizardi mutrikuarra nagusitu ziren. Arratsaldeko kinielak berriz, Uzuri Etxaburu eta Miren Idoeta markina-xemeindarrek osatutako bikoteak, Olaia Otaño mutrikuarrak eta Arai Lejardi markina-xemeindarrak osatutako bikoteak, eta Ziortza Landa ereñarrak eta Eneritz Lizardi mutrikuarrak osatutako bikoteak irabazi zituzten.
Zirkuitua. Nesken Xistera Zirkuituko partida bi ere jokatu zituzten, bata goizean eta bestea arratsaldean. Lehenengo partiduan hiru set jokatu behar izan zituzten Ziortza Landak (Ereño Jai Alai) eta Naroa Merinok (Donosti Jai Alai) garaipena eskuratzeko. Izan ere, lehen jokoa Maddi Jauregik (Beotibar Tolosa) eta Chloe Hirigoyen Cariteauk irabazi zuten 8-15. Bigarren seta berriz, ezberdina izan zen. Landa eta Merino hasieratik jarri ziren aurrean. “Ziortza Landak sekulako jokoa egin zuen, aurrean aginduz eta tantoak ongi amaituz. Atzean nagusitu egin zen Merino Cariteau mendean edukiz”, azaldu dute Xisterako ordezkariek. Berdinketa hausteko hirugarren set bat jokatu zuten pilotariek, eta hirugarren jokoan, bigarrenaren antzera, Landak eta Merinok agindu zuten.
Arratsaldeko partiduan, ostera, set bi nahikoa izan zituzten Maialen Aldazabalek (Berriatua Zesta Eskola) eta Eneritz Lizardik (Danok Bat Mutriku) garaipena lortzeko. Hasieratik hartu zuten abantaila berriatuarrak eta mutrikuarrak eta 15-6 irabazi zieten Maddi Jauregiri (Beotibar Tolosa) eta Naia Calvori (Berriatua Zesta Eskola). Jauregik eta Calvok ederto hasi zuten bigarren jokoa 0-4 aurretik jarriz, zazpinako berdinketaren ostean, ordea, bost tantu egin zituzten jarraian Aldazabalek eta Lizardik jokoa euren alde jarriz. “Alde hori ondo jakin zuten kudeatzen. 15-10 irabazi zuten”.
Xisterako puntistak Madrilgo La Elipa pilotalekuan. Argazkia: Xistera
Maialen Aldazabal eta Eneritz Lizardi Medrilen. Argazkia: Xistera
