Santi Brouard omentzeko batu dira beste urte batez Lekeition
Haren heriotzaren urteurrenero legez, Santi Brouard pediatra eta ezker abertzaleko buruzagia omentzeko batu dira lekeitiarrak. Duela 34 urte Bilboko bere kontsultan tiroz hil zuen GALek.
Eguerdian udaletxe parean elkartu, eta hilerriraino joan dira. Lore eskaintza egin diote bertan, eta Eusko Gudariak abestuz bukatu dute ekitaldia. Brouardegaz batera, 1989ko azaroaren 20an Madrilen tirokatuta hil zuten Josu Muguruza HBko diputatua ere gogoan izan dute.
Senide eta lagun artean, hurbiletik ezagutu zutenek zein belaunaldi gazteagoek bat egin dute Lekeition.
Ezker abertzaleko kideek PSOEren Gobernuaz eta gaur egungo espetxe politikaz hitz egin dute gaurko ekitaldian. GALen garaiak oroituta, Euskal Herrian eragin zuten sufrimendua aitatu dute, eta ordutik euskal herritarrek “dispertsio politika pairatzen” dutela gogora ekarri dute: “Gaur egun eurak daude boterean berriro, eta espetxe politikari buruzko eztabaidaz ari dira”. Euskal presoek Estrasburgotik ere “kolpe latza” hartu dutela adierazi dute, eta PSOEko arduradunak, ostera, hango erabakiekin pozik daudela.
Gaur egungo espetxe politikagaz amaitzeko “borrokak aurrera egin” behar duela azpimarratu dute, eta egunen batean presoak Euskal Herrira hurbiltzea lortzen bada, “herritarren borrokari esker” izango dela esan dute, ez politikarien “borondate onagatik”.
