Haur eta gaztetxoentzako zinema zikloa antolatu dute Ondarroan
Gabonetan hasi zuten zinema zikloa, eta apirilaren amaiera arte, guztira, sei filma proiektatuko dituzte Ondarroako Kofradia Zaharrean.
Zubi Zahar herri ikastolako guraso elkarteko hainbat kide, hurrengo filmearen kartelak eskuetan Aisialdirako proposamen entretenigarria eta dibertigarria dakarte Zubi Zahar herri ikastolako guraso elkarteko kideek: euskarazko zinema zikloa. Guraso elkarteko kideen helburua, haur eta gaztetxoei euskarazko filmak eskaintzea da. Zinema zaletasuna duten guztiak gonbidatu dituzte zinema zikloagaz gozatzera.
Gabonetan hasi zuten zinema zikloa, eta apirilaren amaiera arte, guztira, sei filma proiektatuko dituzte. Kofradia Zaharreko bigarren soilaruko aretoan proiektatuko dituzte filma guztiak. “Asteburu batzuetan Ondarroan ez dago haur eta gaztetxoei zuzendutako kultur ekintzarik, eta Ondarroan, gaur egun, zinemarik ere ez dagoenez, euren neurrira egindako zer edo zer prestatzea erabaki genuen. Hutsune hori betetzen saiatu gara gure proposamenagaz”.
Bestalde, duela gutxi euskaraz estreinatu dituzten filmak proiektatuko dituzte. “Filmarik-eta berrienak lortzen ahalegindu gara”.
Proiektutatuko dituzten filma gehienak doakoak izango direla azpimarratu dute. “Filmaren batean baliteke sarrera kobratu beharra egotea, baina ez da askorik izango; 3 euro, gehienez. Egia esan, estreinaldiaren arabera sarrera kobratu beharra egon liteke. Ekoiztetxe batzuk filma bat proiektatu ahal izateko lizentzia batzuk kobratzen dituzte, beste batzuk sarrera kobratzea debekatzen dute, beste batzuk sarrera kobratzera derrigortu… horren araberako irizpideak bete beharko ditugu”.
Era berean, aretoan arduradunak egongo direla azaldu dute. “Nahi duten gurasoek bost urtetik gorako haurrak bertan laga ahal izango dituzte lasai asko”. Kofradia Zaharra gainera, herritar guztientzat irisgarria delako aukeratu dute. “Aretora igotzeko igogailua dago, irisgarritasuna bermatuta dago, eta modu horretara denek gozatu ahal izango dute zinemaz”. Zinema zikloa aurrera eraman ahal izateko Ondarroako Udalak eman dien laguntza ere eskertu nahi izan dute guraso elkarteko kideek.
Ikastolak estreinako antolatu du zinema zikloa, eta orain arte eduki duten erantzunagaz pozik ageri dira. Abenduaren 30ean Oin Handiaren semea proiektatu zuten, eta Kofradia Zaharreko bigarren solairuko aretoan jende asko batu zela agertu dute. “Areto bete-bete egin zen”. Domekan [urtarrilak 20], berriz, Leo da Vinci: Mona Lisa misioa abenturazko animazio filma “entretenigarria” proiektatuko dute, 17:00etan. Domekako filma doakoa izango da, eta 80 minutuko iraupena du.
Hurrengo asteotan proiektatuko dituzte filmak:
- Otsailak 10: Luis eta estralurtarrak.
- Otsailak 24: Oihaneko kuadrilla.
- Martxoak 17: Smallfoot.
- Martxoak 24: Harpetarrak.
- Apirilak 7: Grufaloa.
