130 bat igerilarik parte hartuko dute 29. Ondarroa Sarian
Ondarroa, Markina-Xemein, Zalla eta Igorreko taldeetako eskolar mailako eta federatutako igerilariek parte hartuko dute proban; denetara, 130 bat izango dira.
Igerilari bat, Ondarroako igerilekuan. Argazkia: Ondarru Igeri Taldea Ondarru Igeri Taldeak antolatuta, igeriketako 29. Ondarroa Saria jokatuko dute Zaldupe udal kiroldegiko igerilekuan zapatuan [urtarrilak 19] . Ondarroa, Markina-Xemein, Zalla eta Igorreko taldeetako eskolar mailako eta federatutako igerilariek parte hartuko dute proban; denetara, 130 bat izango dira.
Txapelketa 10:00etan hasiko da, baina parte hartzaileek aurretik, ordubeteko tartea izango dute beroketak egiteko. LH3, LH4, LH5-6, DBH1-2, DBH3-4, absolutu eta master mailetako lehia ikusteko aukera egongo da. Igerilariek crawl, bizkar, bular eta tximeleta estiloetan 50 eta 100 metroko proba egin ahal izango dituzte bakarka.
Era berean, txandakako lasterketak ere egingo dituzte. Txikienek zortzi neska-mutilez osatutako taldeak osatutako dituzte, eta igerilari bakoitzak 50 metro crawl egin beharko ditu. Nagusiagoek berriz, lauko taldeak osatuko dituzte; kasu batean igerilari guztiek 50 metro crawl egin beharko dute, eta, bestean, igerilari bakoitzak 50 metro egin beharko ditu crawl, bizkar, bular eta tximileta estiloetan.
Sari banaketa, berriz, 14:30ean egingo dute igerilekuan bertan. LH3 eta 4ko parte hartzaile denek domina bat jasoko dute oroigarri, eta podiuma lortzen dutenek berriz, oroigarri bereziak. Besteek, aldiz, goxokiak jasoko dituzte, eta podiuma lortzen dutenek oroigarriak.
Igeri eskolako gazteenen erakusketa. 16:30ean, berriz, Ondarroako igeri eskolako gazteenek erakusketa egingo dute; LH1 eta 2ko 40 batek egingo dute erakusketa. Haur bakoitzak luze bat egin beharko crawl estiloan eta beste bat bizkar estiloan.
Ikusleek sasoi bateko tabernako gelatik edo kanpoko leihoetatik ikusi ahalko dute txapelketa. “Kanpoko leihoetara igo ahal izateko eskailera bat ipiniko dugu eskuragai”. Kirol proba dela eta, igerilekua itxita egongo da 09:00etatik 17:30era.
