Lekeitioren aurkako derbirako autobusa antolatu du Aurrerak
Aurrera Lekeitioren eta Aurreraren arteko partidurako autobusa antolatu du, doan. Eguna eta ordua zehaztu ez badituzte ere, autobusean izena emateko zerrenda zabalik dago
Aurrerako zaletuak. Argazkia: Aurrera FT Ondarroako Aurrera Kirol Elkarteko zuzendaritza batzordeak urtarrilaren azken asteburuan Lekeitioko Larrotegi futbol zelaian jokatuko den Lekeitioren eta Aurreraren arteko partidurako autobusa antolatu du, doan.
Federazioak ez du oraindik partidua noiz jokatuko den argitaratu, baina eguna eta ordu jakin orduko, autobusaren ordutegia jakitera emango dutela azaldu dute zuzendaritza batzordeko kideek. “Ordua jakin orduko, autobusaren irteera eta itzulera orduak sare sozialetan argitaratuko ditugu”.
Eguna eta ordua zehaztu ez badituzte ere, autobusean izena emateko zerrenda zabalik dagoela agertu dute. Izena eman nahi dutenek Zaldupe udal futbol zelaiko bulegora jo edo sare sozialak erabili ditzakete. “Zaleak izena ematen hasiak daude dagoeneko. Autobusa Zaldupetik aterako da, eta partidua amaitu ostean, Zaldupera itzuliko da berriz”.
Zapatuan [urtarrilak 19], berriz, Ibon Lopezen mutilek Iurretaren aurkako partidua jokatuko dute, 17:00etan, Larrako futbol zelaian. Aurrerak lehen itzuliko azken partidua multzoko liderraren aurka jokatuko du.
