Mutrikuko Bar Puerto konpainiak ereserkia estreinatuko du danborradan
Bar Puerto konpainia barikuan aterako da kalera. Aurten, gainera, konpainiarentzat propio osatutako ereserkia estreinatuko dute.
Bar Puerto konpainia barikuan [urtarrilak 18] aterako da kalera, danborrada egingo dute laugarrenez. Aurten, gainera, konpainiarentzat propio osatutako ereserkia estreinatuko dute. Egunotan ereserki berria entsegatzen ari dira konpainia osatzen duten herritarrak.
Gauerdia baino lehen aterako dira kalera arrantzale eta sukaldari arropak soinean, 28 lagun aterako dira danbor jotzen, Imanol Iparragirre Txilin zuzendariaren gidaritzapean. “Urtero kopuru bera izaten gara danbor jotzen. Erdi txantxetan sortu genuen danborrada, eta lehenengo urtean izena emateko aukera eman genien herritarrei. Lehenengo urtean 28 lagunek eman zuten izena, eta horiekin jarraitzen dugu. Bateren bat sartzekotan, beste baten baja betetzeko izango litzateke”.
Urtero modura, moilan zehar egingo dute joan-etorria, danborrak astintzen. Bar Puertoko konpainiaren ereserkiaz gain, Donostiako martxa, Mutriku herria, Idiarena, Tatiago… “Kantu horietan azkena gure ereserkia izango da”.
Bar Puerto konpainiako danbor jotzaileak. Argazkia: Bar Puerto Konpainia
Urrezko Danborra. San Sebastian bezperan Donostiako edozein elkarte gastronomikotan egin ohi duten modura, Mutrikun ere afariarekin emango diete hasiera ospakizunei. Menuan ez dira faltako “begirik gabako angulak”. Mutrikun baina, egun bat arinago egingo dute danborrada. “Ez dio ardura San Sebastian eguna asteko zein egunetan izaten den, gu beti barikuetan batzen gara”.
Afaria amaitu ondoren, berriz, azken unera arte isilpean ondo gordeta edukitzen duten Urrezko Danborra saria banatuko dute. “Saria jaso behar duenak ere ez daki. Era berean, beste sari batzuk ere banatuko ditugu, zilarrezko danborrak, esaterako”.
