Sanbizenteetako hitzordua heldu zaie aulestiarrei eta munitibartarrei
Gaur da San Bizente eguna, eta munitibartarrek bertsotan eta kantuan ospatu dute; zapatuan eta domekan ere egingo dituzte ekintzak. Aulestiko Narea auzoan zapatuan ospatuko dute.
Munitibarko eskolako ikasleek bertsotan eta kantuan eman diote hasiera San Bizente egunari goizean. Herritar batzuk mezatan zeuden bitartean, plazan batu dira eskola umeak irakasle eta senideekin batera.
Eslolak aspalditik parte hartzen du San Bizente eguneko ospakizunean. Lehenago elizan abesten zuten umeek, orain, baina, ospakizuna plazara lekualdatu dute.
Ume zein nagusientzat pintxorik ez da falta izan. Meza ostean, plazako karpapean elkartu dira denak. Hain zuzen, asteburuko ekintzetan ere karparen babesean egongo dira. Bertan eta frontoian egingo dituzte ekitaldiak.
Zapatuan umeentzako puzgarriak eta helduentzat sagardo dastaketa izango dituzte aukeran.
Arratsaldean, Mus Txapelketa jokatuko dute eta iluntzean pizzak dastatu ostean, musikaz beteko da karpa. Mus Txapelketan parte hartzeko, 16:00etan udaletxean izena eman beharko dute, bikoteko 20 euro ordainduta. Hiru sari banatuko dituzte
Gauean, Azalera eta Eskean Kristö taldeek joko dute eta borobiltzeko Dj Bullek musikatuko du plaza.
Domeka arratsaldean, berriz, pilota partiduez gozatzeko batuko dira frontoian.
Aulesti. Bestalde, aulestiarrek Narea auzoan dute zapatuan hitzordua. Aurreko urteetan goizetik gauerako egitarauagaz ospatzen zituzten, aurten, baina, iluntzean amaituko da jaia.
Eguerdian, auzoko ermitan meza entzun ostean umeen jolasak egingo dituzte, trikitilarien doinuez lagunduta. Gero, dema ikusgarria izango dute. Beste behin, zaldien arteko lehia izango da eguneko ekitaldi nagusia. Aulestiko bi zaldi izango dira lehian; Aitor Alzaaren zaldia eta Ibekohondo izango dira protagonistak. 20 minutuko saio bana egingo dute auzoko harriarekin. Goiza auzoko trikitilariek alaituta egongo da.
17:00etatik aurrera, berriz, musean eta briskan jokatzeko aukera izango dute bertako zein inguruko herritarrek. Musean bikoteka eta briskan hirukoteka ariko dira.
Bateko zein besteko irabazleek txapela eta 200 euro jasoko dituzte. Txapeldunordeek 120 euro irabaziko dituzte eta hirugarren sailkatuek 90 euro.
EGITARAUAK:
-AULESTI (NAREA AUZOA). URTARRILAK 26 (ZAPATUA)
- 12:00. Meza auzoko ermitan.
- Ondoren. Umeen jolasak auzoko trikitilariekin alaituta.
- 13:00. Zaldi dema: Ibekohondo eta Aitor Alzaa elkarren kontra.
- 17:00. Mus eta briska txapelketa.
-MUNITIBAR:
- URTARRILAK 26 (ZAPATUA)
- 11:30. Puzgarriak, frontoian.
- 12:30. Txakolin eta sagardo dastaketa, Axpe Sagardotegiaren eskutik.
- 16:00. Mus Txapelketako izen ematea udaletxean (20 euro bikoteko).
- 17:00. Mus Txapelketa, tabernetan
- 20:00. Pizza Fest!, karpan.
- 21:00. Kontzertuak, karpan: Azalera, Eskean Kristö eta Dj Bull.
- URTARRILAK 27 (DOMEKA)
- 17:00. Pilota jaialdia, frontoian (Klubeko pilotarien partiduak).
- Ondoren. Legarra-Arkotxa vs. Muniozguren-Muruaga.
