Astigarragak eta Gandiaga II.ak hirugarren garaipena lortu dute Beteranoen Eskuz Binakako Txapelketan
Bikoteak nahiko orekatu ibili baziren ere, debarrak eta berriatuarrak ez zuten hutsik egin, aurretik jarri ziren hasieratik.
Eñaut Gandiaga, Pradera, Izarra epailea, Astigarraga eta Iban Gandiaga. Argazkia: Akarregi Pilota KE Hirugarren partida irabazita XIV. Beteranoen Eskuz Binakako Txapelketaren sailkapenaren buruan doaz momentuz, Astigarraga eta Gandiaga II.a. Atzo [urtarrilak 27] ere 30 eta 25 nagusitu ziren debarra eta berriatuarra. Txapelketako beteranoena eta gazteena gainera, gero eta hobeto konpontzen direla aitatu dute txapelketaren antolatzaileek, “eta ligaxka honetako faboritoak dira lehen postua eskuratzeko”.
Pradera eta Gandiaga I izan zituzten aurkari atzokoan, eta bikoteak nahiko orekatu ibili baziren ere, debarrak eta berriatuarrak ez zuten hutsik egin. Aurretik jarri ziren hasieratik, hala ere, estualdia ere izan zuten Praderaren jokoari esker markagailuan 22ko berdinketa gertatu zenean. Gandiaga I.ak oso defentsa ona erakutsi zuen bere anaiaren teilatu gainetik bidalitako pilotak bueltatzeko. “Aurrean, berriz, Pradera Astigarraga nahasten saiatu zen arren, ofizio asko duela erakutsi zion Astigarragak, eta azken berdinketaren ondoren, presarik barik lanean jarraituz, tantoak euren aldera eskuratzea lortu zuen”.
Jaunarena-Foster eta Bastida-Conderen arteko lehia ailegatu zen ondoren. Jaunarena nafarra eta Foster lekeitiarra jaun eta jabe izan ziren, 30-18 irabaziz. Beti bezala, seguru jokatu zuen bikoteak, galtzaileak, alderantziz, kantxan tokirik ezin aurkituta ibili ziren atzokoan. Bastidari, gainera, zapatila biak apurtu zitzaizkion partida erdian “eta esparatrapuagaz konpondu ondoren, jarraitzeko gai izan zen”.
Conde, Bastida, Izarra epailea, Jaunarena eta Foster. Argazkia: Akarregi Pilota KE
Txapelketaren antolatzaileek diotenez, txapelketako bigarren garaipen horregaz aurrerapauso handia eman dute Jaunarenak eta Fosterrek, “3-4. postua eskuratzeko aurkari zuzenei irabazita”.
Bi partida besterik ez ziren jokatu atzoko jardunaldian. Beraza-Telleria eta Moral-Egaña bikoteen artean aurreikusita zegoena atzeratu egin dute datorren asteburura. Horrez gain hurrengo partidak jokatuko dira domekan [otsailak 3]:
- 09:30. Pradera-Gandiaga I /Beraza-Telleria
- 10:15. Bastida-Conde / Moral-Egaña
- 11:00. Beraza-Telleria eta Moral-Egaña
- 11:45. Astigarraga-Gandiaga II /Jaunarena-Foster
