Olatz Beitia lekeitiarrak garaipenagaz hasi du Emakume Master Cup
Elexalde frontoian eduki zuen partida atzo eguerdian. Janire Arrizabalaga pilotari gernikarragaz bikotea osatuta ari da lehian, eta lehen kanporaketa gaindituta, txapelketan aurrera jarraitzen dute.
Emakume Master Cup txapelketaren hasiera. Argazkia: Emakume Master Cup Valentzia, Nafarroa, Errioxa, Araba eta Bizkaiko pilotariek hasiera eman zioten atzo [urtarrilak 27], Galdakaon, Binakako Laboral Kutxa Emakume Master Cup txapelketari. Lehenengo 32 partidak jokatu zituzten atzokoan Usansoloko Kurtzea eta Galdakaoko Elexalde eta Unkina pilotalekuetan.
Asteburu honetan hasi da jokoan Olatz Beitia pilotari lekeitiarra. Elexalde frontoian eduki zuen partida atzo eguerdian. Janire Arrizabalaga pilotari gernikarragaz osatu du bikotea aurten. Partidu bat irabazi (18-5) eta beste bat galduta (18-4), txapelketan aurrera jarraitzen dute.
Antolatzaileek jakitera eman dutenez, emakumeen binakako hirugarren txapelketak ikusmina eragin du. Argitu dutenez, promozio mailako lehen jardunaldi hauetan ohikoa izaten da partida batzuetan bikoteen arteko aldeak handiak izatea. “Hala ere, kirolari guztiek barruan zeukaten dena eman zuten ikuskizuna handia izan zedin”, azpimarratu dute.
Lehen maila. Atzo sailkatutako pilotariak Murgian arituko dira hurrengo domekan [otsailak 3] txapelketan sartuko diren lehen mailako pilotariekin. Orain arteko Laboral Kutxa Emakume Master Cuparen bi txapelak elkarrekin irabazi dituzten Leire Etxaniz etxebarritarrak eta Olatz Arrizabalaga gernikarrak ezin izango dute aurten hirugarren txapelketa elkarrekin irabazi, antolatzaileek jakitera eman dituzten lehen mailako bikoteen osaketan bananduta agertzen dira eta. Sei bikoteak bi multzotan banatu dituzte, eta talde bakoitzean ligaxka bat jokatuko da, denak denen aurka, baina jardunaldi bakoitzean partida bakarra jokatuta.
A taldean jokatuko du Leire Etxaniz etxebarritarrak Leire Garai pilotariagaz bikotean. B taldean hasiko du norgehiagoka Olatz Arrizabalagak, Iera Agirre izango du bikote.
