Jokoan dago Euskal Herriko Kluben arteko Zesta-Punta Txapelketa
Berriatuko Zesta Eskolako, Mutrikuko Danok Bat Pelotazale Elkarteko eta Markina-Xemeingo Zesta-Punta Eskolako 26 pilotari parte hartzen ari dira urteroko lehia garrantzitsuan.
Pilotariak zesta-punta jokatzen. Argazkia: Mutrikuko Danok Bat Pelotazale Elkartea Guztira Bizkaia, Gipuzkoa, Araba, Nafarroa eta Iparraldeko 16 klubek jokatuko dute aurten Euskal Herriko Kluben arteko Zesta-Punta Txapelketa, eta euren artean egongo dira Lea-Artibai, eta Mutrikukoak ere: Berriatuko Zesta Eskola, Mutrikuko Danok Bat Pelotazale Elkartea eta Markina-Xemeingo Zesta-Punta Eskola. Txapelketa bederatzi astetan zehar luzatuko da, zazpi aste liga fasea jokatzeko eta finalerdi eta finalen asteburua, eta martxoaren 10eko asteburuan jokatuko dira finalak.
Urtero bezala, finaletara heltzea izango dute helburu Lea-Artibai eta Mutrikuko pilotariek. Ordezkaritza zabala ari da lehian. Markina-Xemeingo Zesta Punta Eskolak esate baterako, hamar pilotari ditu txapelketan; kadete mailan Arakis eta Iriondo ari dira parte hartzen, gazte mailan Alex Goitia eta Atain II., nagusien mailan bi bikote dituzte Aitor eta Mikel Elkorobarrutia anaiak eta Gotzon eta Danel, eta azkenik, ohorezko mailan Arbe eta Ibarluzea.
Berriatuko Zesta-Punta Eskolako zortzi pilotari ahaleginduko dira aurtengo txapelak eskuratzen. Kadete mailan bikote bi ari dira jokoan: Hodei eta Ekaitz eta Markel eta Patxi. Seniorretan eta Ohorezko mailan, bestalde, bikote bana ari dira parte hartzen, Unax eta Txomin senior mailan eta Antxon eta Lekue ohorezkoan.
Kadete, gazte eta nagusien mailetan neurtuko dira Mutrikuko Danok Bat Pelotazale Elkarteko zortzi pilotariak. Bikote bi ariko dira kadete mailan: Manex S. eta Erlantz eta Amets eta Eneritz. Gazte eta nagusien mailetan, berriz, bikote bana izango dituzte, Zuhaitzek eta Aratzek jarriko dituzte indarrak gazte mailan, eta Jon Goixerrik eta Mikel Manzisidorrek seniorretan.
Txapelketako laugarren jardunaldiko partidak izango dituzte asteburuan:
BARIKUA
- Markina-Xemeingo Unian, 19:00etan.
-Nagusiak: Elkoro anaiak (Markina-Xemein)/Kostakoak B
-Ohorezko maila: Gasteiz A/Kostakoak - Berriatuko Mendibarren frontoian, 19:30ean.
-Kadeteak: Hodei-Ekaitz (Berriatua A)/Luzean
-Kadeteak: Markel-Patxi (Berriatua B)/Euskal Jai Alai - Mutrikuko Miruaitz frontoian, 20:00etan.
-Kadeteak: manex S.-Erlantz/Amets-Eneritz
ZAPATUA
- Markina-Xemeingo Unian, 12:00etan.
-Ohorezko maila: Arbe-Ibarluzea (Markina-Xemein)/Zumaia
-Ohorezko maila: Donostia/Cabanillas - Donibane Lohizunen, 16:00etan.
-Senior maila: Unax-Txomin (Berriatua)/Olharroa - Hondarribian, 17:00etan.
-Gazteak: Donostia Jai Alai/Zuhaitz-Aratz - Berriatuko Mendibarren frontoian, 17:00etan.
-Ohorezko maila: Antxon-Lekue (Berriatua)/Gasteiz
-Senior maila: Cabanillas/Goixerri-Manzi (Danok Bat)
