Lehena, oraina eta etorkizuna uztartuta heldu dira Radixu Irratiaren 48 orduak
Ondarroako irrati librea 28. urteurren ospakizunetan murgilduta dago; esperientziadun esatariek eta hasiberriak direnek bat egin dute kanpandorreko estudioan.
Hilbehera, SDR eta Ganberruk FMkoak, 48 orduetan Etenik barik. Uhinetan irratsaio bat bestearen atzetik emanda ari da ospatzen Ondarroako Radixu Irratia 28. urteurrena. Atzo [otsailak 1] hasi eta bihar [otsailak 3] 18:00ak arte, zuzeneneko emisioa eskainiko du irratiak.
Gaur (otsailak 2) goizeko Hilbehera eta S.D.R. irratsaioko esatariek agurtu aurretik nabarmendu duten modura, 29. urteurrenera begira dago irratia, eta hori gauza handia da. Inoiz baino indartsuago dago, esperientziadun esatariekin eta hasiberriekin. Arrosa Sarearen bidez edonon entzun daiteke; webaren bitartez, zuzenean edota geroago entzun daitezke saioak… Urte luzez izan zuten irratsaioa Andoni Idiakez eta Jon Iñaki Jimenez anaiek, eta, orain, urtean behin bada ere, gustura aritzen dira mikrofonoaren bestaldetik kontuak kontatzen: rock musika izan dute gaurkoan hizpide, euskalduna eta atzerrikoa.
Ganberruk FM-koei pasa diete lekukoa 12:00ak pasatxo zeudenean. Saio osatua eskaini dute neska-mutil gazteek. Elkarrizketagaz hasi dute irratsaioa: Eneko Bedialauneta eta Asier Rivera Sahararen aldeko Yaalah elkarteko kideekin aritu dira solasean. Elkartea noiz eta ze helburuz sortu zuten kontatu, eta orain martxan daukaten janari bilketaren berri eman dute. Ez dute falta izan igarkizun, txiste eta abestirik.
Famauk FM, Lotsabakuk, Lorituk FM, Binilo Artin Galdute, Terranobako Salau, Leartigol... Radixu biztuz gero, horiek eta askoz gehiago entzuteko aukera egongo da datozen orduetan.
HONEKIN LOTUTA: Radixu Irratiak 21 irratsaio prestatu ditu 48 orduetarako