Euriari, txingorrari eta haizeari aurre eginda aritu dira santa eskean Mutrikun eta Berriatuan
Usadioari jarraituta, goizez zein arratsaldez ibili dira atariz atari koplatan. Eztarriz eta umorez sano dabiltzala erakutsi dute beste urte batez santa eskean atera diren herritarrek.
Aldalur, Astigarraga eta Aizpurua, Mutrikun erronda hasteko gogotsu Santa eskearekin hitzordu garrantzitsua eduki zuten atzo [otsailak 2, zapatua] Mutrikun eta Berriatuan. Neguak bere aurpegirik zakarrena erakutsi arren, gogotsu astindu zituzten makilak eta eztarriak goiz eta arratsaldez. Eguraldi txarrari irriparrea galdu gabe erantzun zioten.
Goiztiarrenak mutrikuarrak izan ziren. Ohi bezala, Mutrikuko Bertso Eskolak 09:00etarako jarri zuen hitzordua Zubiaga plazan, eta ordu erdi beranduago, udaletxerako bidea hartu zuten. Jose Angel Lizardi alkatea zeukaten zain bertan. Udaletxeko aterpearen babesean aritu ziren koplatan Alex Astigarraga Bergara, Malen Aldalur Azpillaga, Antton Aizpurua Aldape, Alexander Idoeta Anakabe eta Orlando Arreitunandia, Jon Ansorregi soinu jotzailea eta Mutrikuko trikiti eskolakoak eta herritarrak lagun zituztela. Usadioari jarraituta, alkateari santa eskean ateratzeko baimena eskatu zioten, baita diru ekarpena ere, umorerik falta ez zuten kopletan.
Eztarriz sano zebiltzala erakutsi zuten, beste behin ere. Bildutako dirua Goizeko Izarra ikastolarentzat izanik (50. urteurrena du aurten), ohi baino ume gehiago animatu ziren parte hartzera. Talde argazkia ateratzeko bildu ziren elizako eskaileretan, eta herrigunetik atera ziren abesten. Lau taldetan banatuta atera ziren bazkal ostean, gaueko orduetara arte iraungo zuen errondari ekitera. Minbiziaren Aurkako Elkarteko kideak gehitu zitzaizkien arratsaldeko santa eskean.
10:00etan hasi zuten erronda Berriatuan. Eskolaurretik irtenda, baserriz baserri aritu ziren kantuan, Tarineko trikipand taldearen doinuak lagun. Joseba eta Iñigo Goienola, Altzalei, Imanol Aldazabal eta Julen Sololuze aritu ziren bertsotan. 25 bat lagunek egin zuten goizeko erronka, eguraldi txarrari aurre eginda, eta umoretsu.
Elkartean bazkaldu ostean, 15:00etan frontoian jarri zuten ordua. Bi taldetan banatuta atera ziren santa eskean arratsaldean. Herrigunean aritu ziren kantuan bi taldeak, eta 18:00etan, udaletxe inguruan bat egin zuten guztiek. Arratsaldeak aurrera joan ahala, urtero legez, kantatzeko gogotsu zeuden herritarrak gehituz joan ziren. Txokolate jana eta afaria izan zituzten amaieran opari.
HONEKIN LOTUTA: Santa Agedako EGITARAUA, HERRIZ HERRI
