Aspaldiko partez, Plazaberripean egin ordez, zelaian egin dute otsaileko bigarren zapatuko azoka ezaguna. Toki berrian gustura egon dira saltzaileak.
Goizetik eguerdira ehunka lagunek bisitatu dute gaur [otsailak 9] Markina-Xemeingo XVII. Zuhaitz, Landare eta Baserri Tresneria Azoka. Bisitarien eta saltzaileen gozamenerako eguraldi bikaina egin du, eta iaz baino jende gehiago batuda azoka eremuan. Girok onik ez da falta izan, eta erosleek lau orduz azokaren ateak zabalik eduki dituzte postutik postura ibiltzeko; asko eskuak beteta etxeratu dira.
Landare zaleek urteroko hitzordua ez dute galdu nahi izan. Zelaian batu direnek zuhaitz eta landareen salmenta zuzeneko hamar mintegi aurkitu dituzte. Zuhaitz, zuhaixka, landare, lore edota haziak eduki dituzte aukeran.
Mintegietan denetarik saldu dute. Ohiko landare edo arbolak saldu dituzte gehienbat, baina gauza bereziagoaren bat erostera joan denik ere egon dela azaldu dute postuetako saltzaileek. Fruta arbolen artean, batez ere, sagarrondoak saldu dira, baita zitrikoak ere. Itxaurrondo eta gaztainondoak ere nahikoa saldu dituzte. Era apalagoan aranondoak eta gereziondoak ere saldu dituzte. “Otsaila bukaeran edo martxo hasieran landatu beharreko fruta arbolek eduki dute arrakastarik gehien”, esan du saltzaile baten. Fruta arbola bereziagoen bila joan direnek, berriz, mamigorriko sagarrak edo paupaua erosi dituzte, esaterako.
Eguraldi onagaz, loredun landareak erostera animatu dira asko, neguko eta udaberri hasierako loredun landareak. Horien artean, udaberria iragartzen duten udaberri loreak, pentsamenduak, aza apaingarria, primulak eta geranioak asko saldu dira gehienbat. Sukaldatzeko erabiltzen diren landareak ere asko saldu direla agertu dute. “Horiek tipiko bat dira”.
Fruitu landareen artean, sasoian sasoiko eta klima hotzekoak saldu dituzte gaur; horien artean ahabia eta mugurdia saldu dira gehienbat. Ahabia eta mugurida modukoa fritu landareak gero eta gehiago saltzen dituztela esan dute saltzaileek. “Lehen ez ziren hainbeste saltzen. Ez zegoen ohiturarik jateko hemen”.
[Zuzenean ARGAZKI GALERIA ikusi]
Salmentak, oro har, polito joan direla esan dute zuhaitz eta landare mintegietan batutakoek; horretan eguraldiak ere bere eragina izan duela nabarmenduz. Baina kontrakoa adierazi duen bateren bat ere egon da. Azokan jende asko ibili bada ere, beste urte batzuetan baino gutxiago saldu dutela agertu dute azken horiek.
Hori bai, erosleak beste urte batzuetan baino berantiarragoak izan direla agertu dute gehienek. Izan ere, mugimendu haundiena eguerdi partean igarri da. “Aurreko urteotan jendea goizago ibili da”.
Azokan, gainera, eskualdeko baserriko produktuak erosteko aukera ere egon da. Gazta, arraultza, okindegi, gozogintza, eztigintza, ahateki, ardo eta marmelada ekoizle postuek osatu dute gaurko eskaintza. Bertaratu direnek saltzaileek eskainitako gutiziak probatu eta erosteko aukera eduki dute. Artisauek ere euren txokoa eduki dute azokan.
[Zuzenean ARGAZKI GALERIA ikusi]
Azokara etorri direnek urdailak bete eta eztarriak bustitzeko aukera ere eduki dute. Izarbidean elkartekoek ipinitako postuan etxean egindako patata tortilla eta hainbat opil jateko aukera egon da, eta alboko txosnan, berriz, taloa sagardoaz edo txakolinaz lagunduta jatekoa.
Azokagaz gain, Merkatu Txikia ere egin dute Hemen Be Bai elkarteko merkatariek Arkupe aurrean. Bien bitartean, umeek ere olgetan aritzeko tartea eduki dute, arku-tiroa probatu, trikimako gainean… eta beste hainbat jolasetan aritzeko aukera izan dute.
