Apirilaren 26an itxiko dute Mutriku eta Deba arteko errepidea, lau hilabeterako
Markel Olano Gipuzkoako ahaldun nagusia errepideko lanak ikuskatzen egon da gaur (otsailak 21). "Proiektu hau martxan jarrita, mutrikuarren aldarrikapen historiko bati erantzun eta konponbidean jartzea lortu du aldundiak".
Olano, Oiarbide eta Lizardi, obra zuzendarirarekin batera. Errepidea apirilean itxiko zutela aste batzuk aurretik esan bazuten ere, oraingoan data zehaztu du Olanok: apirilaren 26a. Eta lehen errepidea hilabete gehiagoz itxita egongo zela esan bazuten ere, orain zehaztu dute lau hilabetez egongo dela itxita. Horrez gain, proiektu osoa 2020 urte hasierarako amaituta egotea aurreikusten dutela argitu dute.
Galtzada “gutxienez” zazpi metroaino zabalduko dutela esan du Olanok Mutrikuko Ondarbeltzeko aparkalekuan egin duen agerraldian. Eta aurretiaz esan zuten modura, jarduera nagusiak Ipitxarri bihurgunean eta Alkolea muturrean egingo dituztela berretsi du. “Lanak egin eta gero egongo den tunel berriari esker, azken puntu hori guztiz saihestuko da”. Oro har, proiektuari esker GI-638 errepidea “nabarmen hobetuko” dela gaineratu du.
Otsaileko lehenengo egunetan aurretiazko lanak egiten hasi zirela gaineratu du. “Momentu honetan Laranga auzorako sarbideen egokitzapena, soberakinen deposituen prestaketa eta ezpondetara iristeko pisten eraikuntza egiten ari dira”.
Errepide horretatik batazbeste egunean 6.000 ibilgailu pasatzen direla esan dute. “Horrez gain, Mutriku eta Deba lotzen dituen ia errepide bakarra da”. Hobekuntza lanak eginda, gidarien segurtasuna handitu eta herritarren bizi kalitatea hobetuko dela gaineratu du. Izan ere, errepidea hobetzeaz gain, egitasmoak oinezkoentzako bidea eta bide gorria egitea aurreikusten du. “Oinezko pasealekuarekin eta bide gorriarekin, herri hauetako biztanleak gure itsasertzeko paisaiaz gozatu ahal izango dute, ibilaldi osasungarriak eginez”.
Galbaixoko errepideko lanak Aste Santurako amaituta egongo direla esan du Olanok: “Lan horiek amaitu eta gero itxiko da kostaldeko errepidea. Horrek ez du inongo eraginik edukiko kostaldeko errepidea hobetzeko proiektuan”
Proiektu osoak 10 milioi euroko aurrekontua daukala gaineratu du ahaldun nagusiak. Zehaztapen horiek guztiak emateko, Olanok alboan eduki ditu Jose Angel Lizardi Mutriku alkatea eta Aintzane Oiarbide Bide Azpiegituretako foru diputatua.
Galbaixoko errepidearen inguruan lasaitasun mezua zabaldu nahi izan du Olanok. Izan ere, lur jausia gertatu zenetik, GI-3230 errepidea itxita dago; aldundia errepidea egoki jartzeko lanak egiten ari da. Kostaldeko errepidea itxita egongo den hilabeteetan ibilgailuak Galbaixotik pasatu beharko direnez, errepide horren egoerak kezka eragin du herritarren artean. “Gaur egun errepide horretan hiru esku hartze ari gara egiten, eta lan horiek guztiak Aste Santurako bukatuta egongo dira. Beraz, ez du inongo eraginik edukiko kostaldeko errepidea hobetzeko proiektuan”.
Alde batetik, lur jausia gertatu zen lekuan, kalteak konpontzeko larrialdi mailako esku hartzea egiten ari dira egiten. “Lan horiek Aste Santurako amaitzea espero da“. Horrez gain, Astigarribia auzoan galtzada zabaltzeko lanak ari dira egiten. Azkenik, errepide osoaren gainazalean dauden zuloak konpondu eta hobekuntzak ere egingo dituztela esan du.
Kostaldeko errepidea (GI-638) itxita egongo den hilabeteetan, luzera eta pisu mugak egongo dira Galbaixoko errepidean; kamioi eta autobus handiak ezingo dira handik pasatu. Bestalde, autobus lineek zerbitzua handik eskainiko dutela gogorarazi du Olanok. Horretarako, baina, zirkulazio baldintzak betetzen dituzten ibilgailuak erabiliko dituzte.
