Mutrikuko EH Bilduren alkategaia aukeratzeko bozketa egingo dute egunotan
Otsailaren 22an, 23an eta 24an Mutrikuko EH Bilduk alkatetzarako proposatu dituen Joakin Larrañagaren eta Joseba Palenzuelaren artean bozkatzeko aukera egongo da. Koalizio abertzaleak bozketa egiteko bi era ipini ditu herritarren esku: presentziala eta telematikoa, hain zuzen.
Bozka aurrez aurre eman nahi dutenek Zubixara jo beharko dute barikuan [otsailak 22], zapatuan [otsailak 23] edo domekan [otsailak 24], 10:00etatik 20:00ak tartean, nortasun agiria eskuan. “Horrekin inskribatu ahalko dira, eta gero bertan, bozka eman ahalko diote batari edo besteari”. Presentzialki bozka emateko orduan lau bitartekari egongo direla nabarmendu dute.
Era berean, domeka gauerdira arte telematikoki bozka emateko aukera ere egongo da. Herritarrek horretarako erroldan izena eman beharko dute EH Bilduk horretarako prestatu duen webgunean. Erregistratzen direnek hautagai bat edo bestea aukeratu edo botu txuria eman ahako dute.
Gogorarazi dutenez, aurrez aurre zein telematikoki emango diren botu guztiak isilpekoak izango dira. Parte hartzea nahi dute bultzatu, eta horretarako pintxo-pote berezia egingo dute domekan. Emaitzei dagokienez, inskribatu diren guztiei sistema telematikoak berak bidaliko die astelehenean hautagai bakoitzak jaso dituen bozken ehunekoa.
