Nahia Quincocesek bi urre lortu ditu Txinan
Bakarkako lasterketa eta lasterketa bertikala nagusitasun osoz irabazi ditu mendi eskiatzaile mendexarrak. Bi lasterketak irabazteko faboritoa zen, eta aurreikuspenak bete egin dira.
Nahia Quincoces probetako batean helmugaratzen. Argazkia: International Ski Mountaineering Federation Egunotan Munduko Mendi Eski Koparen laugarren jardunaldia ari dira jokatzen Txinako Jilin probintziako Beidahu herrian. Aurretik Austrian, Andorran eta Frantzian jokatu dira Munduko Koparen probak; Txinan lortutako garaipenak aurtengo Munduko Kopan lortu dituen lehen garaipenak izan dira Nahia Quincoces Altunarentzat.
Txinako txapelketari dagokionez, parte hartzaileek hiruz diziplinatan parte hartzeko aukera eduki dute. Bakarkako lasterketa, lasterketa bertikala eta esprint lasterketa. Lehen bi probetan urrea lortu ondoren, esprint lasterketan hirugarren urrea lortzeko aukera handiak ditu mendi eskiatzaile mendexarrak.
Eguaztenean [otsailak 20] jokatu zuten bakarkako lasterketa. Parte hartzaileek 1.460 metroko desnibel positiboko eta sei igoera eta jaitsierako zirkuitu bat bete behar izan zuten; tarteka egin behar izan zuten oinezko tartea ere oso teknikoa izan zen. Probari dagokionez, aurkari bakarraren aurka aritu zen; Na Zhang txinatarraren aurka, hain zuzen. Quincoces hasierako metroetatik aurrean jarri zen, eta proba nagusitasun osoz irabazi zuen. Zhang baino 26 minutu eta 49 segundo arinago helmugaratu zen.
Nahia Quincoces Txinako podiumean. Argazkia: ISMF
Lasterketa bertikala, berriz, gaur [otsailak 21] bertan lehiatu du aurkari beraren aurka. 610 metroko desnibel positibodun 2,8 kilometroko lasterketa amaitzeko 26 minutu eta 4 segundo behar izan ditu mendexarrak; aurkariak baino 5 minutu eta 50 segundo gutxiago, hain zuzen. Bihar [otsailak 22], berriz, esprint lasterketari ekingo diote.
