Zabalik dago Artedrama Euskal Laborategian izena emateko epea
Apirilaren 22tik 27ra ospatuko da aurtengo Artedrama, Aulestin. Aurten, emakumeen ikusgarritasuna bultzatzeko, irakasle guztiak emakumezkoak izango dira.
Arte eszenikoetan euskaraz aritzen direnen topagunea izaten da Aulesti Pazko Astean. Izan ere, agertokietan euskaraz aritzen diren aktore, zuzendari, antzerkigile zein antzerkizaleentzako zabaltzen den gunean izaten da Artedrama Euskal Laborategia. Aurten apirilaren 22tik 27ra egingo da, eta horretan parte hartu nahi dutenak oraindik garaiz daudela esan dute; hamalau leku geratzen zaiela aurreratu dute. Izena emateko posta elektronikoa idatzi (info@artedrama.com) edo telefonoz deitu ahal da (615 77 95 11/636 55 22 44).
“Euskal Herriko arte eszenikoetan murgilduta gaudenon arteko eztabaidak, jakintza eta elkartrukeak sustatzeko, astelehenetik zapatura, guztira 48 orduz, bost irakasleren tailerrak prestatu ditugu”.
Gaineratu dutenez, arte eszenikoen alorrean emakumeek duten ikusgarritasun faltarekin kezkatuta daude. “Horren harira, pentsatu dugu aurten irakasle guztiak emakumezkoak izatea. Euskal eszenan ekarpen ederrak egiten ari diren sortzaileak izango dira”. Ondokoak izango dira irakasleak: Laida Azkona, Laura Penagos, Getari Etxegarai, Estitxu Zaldua eta Iraia Elias. “Jarri gurekin harremanetan, eta eman izena!”.
