Isuntzak eta Ondarroak lau estropada irabazi dituzte Bizkaiko Batel Ligako V. jardunaldian
Isuntzako arraunlariek hiru estropada irabazi dituzte, eta Ondarroakoek, berriz, estropada bat. Beste kategoria batzuetan ere aurreko postuetan ibili dira eskualdeko arraunlariak.
Isuntzako arraunlariak garaipena ospatzen. Argazkia: Bermeo Arraun Argazkiak Sestaon jokatu den Bizkaiko Batel Ligako V. jardunaldian emaitza oso onak lortu dituzte Lekeitioko eta Ondarroako arraunlariek. Isuntzakoek alebin mailako emakumeen, txiki mailako gizonezkoen eta kadete mailako gioznezkoen estropadak irabazi dituzte. Ondarroakoek, berriz, alebin mailako gizonezkoen estropadan nagusi izan dira.
Lehiari dagokionez, alebin mailako emakumezkoen estropada Isuntza A batelak irabazi zuen (02.37,35), atzetik sailkatu ziren hurrenez hurren, Ondarru C, Ondarru A eta Ondarru B. Alebin mailako gizonezkoen estropada, berriz, Ondarru B nagusitu zen (02.28,09). Ondarru A, Portugalete eta Isuntza A helmugaratu ziren, hurrenez hurren, atzetik.
Txiki mailako emakumezkoen estropadan Ondarru B eta Isuntza Ak bigarren eta hirugarren amaitu zuten, hurrenez hurren. Txiki mailako gizonezkoen estropada, berriz, Isuntza A batelak nagusitasun osoz irabazi zuen (04.47,39).
Kadete mailako emakumezkoen estropada 3. postuan amaitu zuen Isuntza A ontziak. Atzetik helmugaratu ziren Ondarru D eta Isuntza B, besteak beste. Kadete mailako gizonezkoen estropadan nagusi izan zen Isuntza A (06.49,44), eta haren atzetik amaitu zuten Bermeo A eta Kaiku A ontziek. Absolotu mailako gizonezkoen estropada 4. amaitu zuen Isuntza B batelak.
Oriaren XXV. traineru jaitsiera. Zapatuan [martxoak 9], aldiz, traineru arraunlariek beste hitzordu garrantzitsu bat eduki zuten Orion. 82 traineruk parte hartu zuten lehian, eta horien artean Lekeitio, Mutriku eta Ondarroako ordezkariak egon ziren. Emakumezko absolutu mailan Ondarroan 10. postuan amaitu zuen Saikola eta Orio artean jokatu zen 4.000 metroko estropada. Isuntza, berriz, 17. helmugaratu zen.
Gizonezkoen absolutu mailan 31 traineruk parte hartu zuten. Bertokoen artean Ondarroa A izan zen azkarrena, 6. postuan amaitu zuten. Isuntza Ak 8, Ondarroa Bk 18, Isuntza Bk 26. eta Mutrikuk 29. amaitu zuten.
