Pazkuetako Idi Proben 66. Sari Handia jokatuko dute aurten Etxebarrian
Sari handiak banatuko ditu Etxebarriko Udalak. Lehenengo gelditzen den idi bikoteak 1.600 euro, mantak eta garaikurra eskuratuko ditu.
Etxabarriko Pazkuetako Idi Probak. Argazkia: Mari Jose Etxaniz Pazkuetako Idi Proben 66. Sari Handia lehiatuko da Etxebarrian Martxoaren 29tik apirilaren 8ra bitartean. Idi deman parte hartu nahi dutenek, domekan [ martxoak 17] deitu behar dute Etxebarriko udaletxera (94- 616 64 32 telefono zenbakia), 12:00etatik 13:00etara. Egun horretan zehaztuko dituzte parte hartzaileen zerrenda eta saioak.
Aurten ere, sari handiak banatuko ditu Etxebarriko Udalak. Lehenengo gelditzen den idi bikoteak esate baterako, 1.600 euro, mantak eta garaikurra eskuratuko ditu, bigarrenak 1.400 euro eta garaikurra eta hirugarrenak 1.200 euro eta garaikurra. Guztira hamabost sari egongo dira. Horrez gain, Lea-Artibai eskualdeko lehenengoak 300 euro eta akulu sorta lortuko ditu. “Sari hori jasotzeko gutxienez, bi idi bikotek parte hartu beharko dute, eta Lea-Artibain erregistratuta egon beharko dute hiru hilabetetik gora”.
Baldintzei dagokionez, bikote guztiak pisu oinarritzat 1.100 kilo izango dituzte eta idi-buztarri bakoitzak akulari bi eramango ditu. Idiak 10:00etan pisatuko dituzte probalekuan, dagozkien egunean. Izan ere, bikote bakoitzaren eguna antolatzaileek erabakiko dute. Lehiaketa, bestalde, Euskal Herriko Kirol Federazioak kontrolatuko du, eta probak “doping-aren kontrako arauen barruan” egingo direla jakitera eman dute antolatzaileek.
Beti bezala, Etxebarriko 1.500 kilo inguruko harria erabiliko dute sariketan.
