Lekeitioko trinketeko Beteranoen Eskupilota Txapelketaren finala jokatuko dute domekan
12:00etan lehiatuko dute Beraza-Telleria eta Asti-Gandiaga II bikoteek. Aurretik, 3. 4. 5. eta 6. postuak erabakitzeko partiduak jokatuko dituzte.
Beraza-Telleria eta Asti-Gandiaga II bikoteen arteko finala hartuko du Lekeitioko trinketeak, domekan (martxoak 24), 12:00etatik aurrera.
Aurretik, baina, XIV. Beteranoen Eskuz Binakako Txapelketaren 3. 4. 5. eta 6. postuak erabakitzeko partiduak lehiatuko dituzte.
Lekeitioko Akarregi Pilota KEren arduradunen berbetan, finalean “ikuskizun handia” ziurtatuta egongo da. Astigarraga debarra eta Gandiaga II. berriatuarrak txapelketa guztian ez dute partidurik galdu, eta sendo agertzen dira faborito modura. Hala ere, Beraza elgoibartarra eta Telleria mallabiarra aurkari gogorrak dira. Telleria azken hiru urteetako txapelduna da, eta Beraza oso ezaguna da halako txapelketetan. Astigarraga da txapelketako beteranoena (65 urte ditu), eta atzean txapelketako gazteenagaz aritu da (40 urteko Iban Gandiagagaz). “Orain arteko erregulartasuna erakusten badu, Astigaraga gai izango da bere sake-sarera jokaldia egiteko eta aurrean ondo defenditzeko”.
5. eta 6. postuak erabakitzeko partiduan ere dema polita ikusteko aukera egongo dela gaineratu dute Akarregikoek. Moral lekeitiarra eta Egaña mendarotarra maila hobetzen joan dira, eta estu hartu ditzakete Bastida debarra eta Conde elgoibartarra. 10:00etan hasiko da bikote horien arteko neurketa.
Ondoren, 11:00etatik aurrera, Jaunarena-Foster eta Pradera-Gandiaga I bikoteen artean erabakiko da txapelketako hirugarren postua. Jaunarena nafarrak eta Foster lekeitiarrak txapelketa bikaina egin dute, eta batera inoiz lortu duten posturik hoberena lortzeko erronka dute aurrean. Halaber, Pradera mallabiarrak eta Gandiaga I. berriatuarrak ere bikote sendoa osatu dute. “Azken hauen gaztetasuna abantaila garrantzitsua izan liteke, baina beteranoek beren defentsa ona erakusten badute, partida aurrera ateratzeko gai izango dira”, zehaztu dute.
Sari banaketa ekitaldian egongo dira Lekeitioko alkatea, kirol zinegotzia eta txapelketaren babesleetako batzuk. Hala, MT, Erabil eta Danobat enpresetako ordezkariek ere parte hartuko dute. Era berean, lekeitiar jokalari onenak sari berezia jasoko du, Silken Uribarren Hotelaren eskutik.
