Mendexako zaldi lasterketetan izena emateko epea aste honetan amaitzen da
Apirilaren 18an, 11:30ean hasiko dira lasterketak. Mendexako udaletxera deituta (94-684 21 06) edo WhatsAppez 657 79 03 84 telefono zenbakira mezua bidalita izena eman ahal da.
Urte legez, Aste Santuarekin batera helduko dira Mendexako Zaldi Lasterketak. Hain zuzen, apirilaren 18an (Eguen Santu egunez) lehiatuko dituzte Karraspio hondartzan, 11:30ean hasita.
Parte hartu gura duten zaldizkoek, baina, aldez aurretik izena eman behar izaten dute, eta domekara (martxoak 31) arteko epea dago. Mendexako udaletxera deituta (94-684 21 06) edo whatsapp bidez honako telefono zenbakira mezua bidalita izena eman daiteke: 657 79 03 84.
Lasterketak lehiatu ahal izateko, zalduna 14 urtetik gorakoa izan behar dela gogoratu dute, eta zaldiaren osasun agiria aurkeztea ere beharrezkoa da.
Beste behin, zaldien araberako bi motako lasterketak egongo dira. Hau da, alde batetik odol garbiak zaldien lasterketa lehiatuko dute, eta beste alde batetik, gurutzatuak diren zaldiena.
Halaber, modalitate bakoitzeko sariak banatuko dituzte. Odol garbietan nagusitzen diren zaldizkoak eta zaldiak 300 euro, txapela eta garaikurra jasoko dituzte. Bigarren sailkatuak 250 euro irabaziko ditu, eta hirugarrenak 200 euro. Gurutzatuen sariei dagokienez, irabazleak 150 euro eta garaikurra eskuratuko ditu; bigarren postua lortzen duenak 100 euro jasoko ditu, eta hirugarrenak 75 euro. Era berean, gainontzeko parte hartzaileek ere diru saria jasoko dute.
