Geoparkeak 2019ko bisita gidatuen denboraldi berria aurkeztu du
Bisita gidatuen bederatzigarren denboraldiari hasiera emateko helburuarekin, Geoparkeak antolatutako lehen irteera gidatua egin dute asteburuan. Bisita gidatua guztiak euskaraz eta gaztelaniaz eskaintzen dira, eta eskaera handiagoa den irteeretan audio gidak ere badaude eskuragarri ingelesez, frantsesez eta baita alemanez ere.
Bisita gidatuek, hain zuzen, Euskal Kostaldeko Geoparkeak gordetzen duen balio natural, geologiko eta kultural garrantzitsua ezagutaraztea eta gizarteratzea dute helburu. Eta aurten, Geoparkea oinez zein itsasontziz ezagutu eta deskubritzeko 17 bisita gidatu ipini dituzte bisitariaren eskura. “Proposamen hauek guztiak bisita gidatuen liburuxka berrian daude jasota; liburuxka eskuragarri dago turismo bulegoetan”.
Bisita gidatuen eskaintzaren barruan, euskal itsas ondarearen harribitxia den Mutrikuko Arrieta Jauregia ezagutzeko aukera ere badago. “Mutrikun XVIII. mende hasieran eraikia, jauregiak Interes Kulturaleko Ondare izendapena du eta Gipuzkoan ondoen gordetzen den ondare baliabideetako bat da”. Jauregia iazko ekainean zabaldu zen jendaurrera eta orduz geroztik ia 800 lagunek bisitatu dute. “Bisita honek Euskal Kostaldeko Geoparkearen kultur eskaintza osatzen du, balio historiko-artistiko handia duen baliabidea gehituz”.
Beste aukeren artean, Deba eta Zumaia arteko itsas irteeren maiztasuna ere handitu egin dute, “GR-121 ibilbidea oinez egin nahi dutenentzat abiapuntura itzultzeko aukera bikaina”. Modu berean, Geoparkeak ohiko bisita gidatuak ere eskainiko ditu: barnealdeko bailara ezkutuak ezagutzeko ibilbideak, kutsu zientifikoagoa duten irteerak, familiartean egiteko proposamenak…
Bisita gidatuen bederatzigarren denboraldiari hasiera emateko helburuarekin, Geoparkeak antolatutako lehen irteera gidatua egin dute asteburuan. Ia 40 lagunek egin zuten domekan [martxaok 31] Debatik Zumaira doan GR-121 ibilbidea oinez; taldeak itsasontziz egin zuen itzulerako bidaia.
