Tokiz aldatu dute Ondarroako taxi geltokia
Taxientzako lau leku egokitu dituzte Itsasaurreko aparkalekuan, autobus geralekuaren atzeko aldean.
Itsasuarreko aparkalekuan atondu duten taxi geltoki berria. Argazkia: Ondarroako Udala Ondarroako Udalak jakitera eman duenez, Antiguako Ama kaletik Itsasaurrera lekuz aldatu dute taxien geltokia. Erabiltzaileek, zehatz esanda, autobus geralekuaren atzeko aldean hartu ahal izango dute taxia hemendik aurrera. Denetara, taxientzako lau leku egokitu dituzte Itsasaurreko aparkalekuan bertan.
Zunbeltz Bedialauneta Ibaibarriaga alkateak agertu duenez, Antiguako Aman zirkulazio mugimendu handia egoten da egunero, eta arrazoi horregatik lekuz aldatu dute taxi geltokia. “Tamalez, bigarren ilaran ibilgailu asko egoten dira. Taxistekin zuzenean jarri ginen kontaktuan, eta irtenbiderik onena taxi geltokia Itsasaurrera lekuz aldatzea zela erabaki genuen”.
Taxiak lehen geratzen ziren tokia (Maddi aurrea), berriz, karga-deskarga gune modura atonduko dute; datozen egunotan margotuko dute behegainea. “Gune horretan karga-deskarga gune bat beharrezkoa dela iruditzen zaigu”.
Ondarroako taxi geltoki berria. Argazkia: Ondarroako Udala
