228 mendizalek osatu dute Markina-Xemeingo 54. Ibilaldi Neurtua
Ibilaldi Neurtuagaz "gustura" geratu dira parte hartzaileak. Oiz mendiko aldapa izan dela neketsuena azpimarratu dute ibilbide luzeko partaideek.
Ibilaldi luzeko partaide batzuk Arkupe aurreko mahaira helduta. Basaz beterik, baina helburua betetako pozagaz, ailegatu ziren atzo [apirilak 7] Artibai Mendigoizale Taldeak Markina-Xemein inguruetan antolatutako 54. Ibilaldi Neurtuko 228 parte hartzaileak Arkupe aurreko helmuga mahaira. Euriaren beldurrez, asko izan ziren egunean bertan izena eman zuten mendizaleak. Urtero modura, bi ibilbide eduki zituzten aukeran: 28 kilometroko luzea eta 14 kilometroko laburra. 141 mendigoizalek osatu zuten luzea eta 87 animatu ziren txikia egitera.
Goiz hasieran euri apur bat eduki bazuten ere, gehienbat ateri eduki zuten ibilbidean. Hala ere, aurreko egunetako euriek basa eragin zuten bidean, eta batez ere Oiz igotzea “neketsua” izan zela azpimarratu zuten ibilbide luzeko partaideek. Izan ere, bera zen ibilbide luzeko zatirik aldapatsuena eta makilen laguntza beharrezkoa zela aditzera eman zuten batzuek, “gorantz errazago egiteko”.
Hori eta guztiz ere, Ibilaldi Neurtuagaz “gustura” geratu ziren parte hartzaileak, eta ezusteko atsegina ere eraman zuten batzuek amaieran. Markina-Xemeingo mendigoizale taldeak bertoko produktuen zozketa bat egin zuen partaideen artean, eta erdiak baino gehiagok eraman zuen oparia: Igotz edo Larrus gaztak, Axperen sagardo botilak, Baskaranen yogurtak, Lanekoren zukuak…
09:00etan Markina-Xemeingo autobus geltokian elkartu eta Ziortza-Bolibarrera abiatu ziren autobusez ibilbide motzeko parte hartzaileak, eta 10:00ak aldera irten ziren Ziortzatik oinez. Martxa onean egin zuten ibilbidea, 3 ordu eta erdian egin zitekeela kalkulatu zuten Artibai Mendigoizale Taldekoek eta epe hori bete orduko ailegatuta zeuden denak Arkupeko mahaira. Horietako batzuk ere eraman zituzten zozketako opariak.
