Hamazazpi zaldiren arteko lehia hartuko du Karraspiok

Eguenean lehiatuko dituzte Mendexako Zaldi Lasterketak. Bestalde, Txus Jaio pilotuak eta Iker Mintegia moto gidariak ikuskizuna eskainiko dute.

Aintzina Monasterio Maguregi

Mendexa

2019/04/16

Aste Santuko oporraldiagaz batera, badatoz Mendexako Zaldi Lasterketak. Eguenean (apirilak 18) lehiatuko dituzte, eta hamazazpi zaldi batuko dira aurten.

Lasterketa “berezi bezain ikusgarria” antolatu dutela adierazi dute Kuku Habixa Kultur Elkartearen ordezkariek: “11 zaldi izango dira odol garbiak mailan eta 6 zaldi gurutzatuak mailan”.

Txapela eta garaikur berezia prest dituzte.
Argazkia: Kuku Habixa Kultur Elkartea.

Sariak. Odol garbietako irabazleak txapela, Mendexa-Laperri garaikur berezia eta 300 euro jasoko ditu. Gurutzatuetako txapeldunak garaikurra eta 150 euro jasoko ditu.

Odol garbietan bigarren sailkatuak 250 euro irabaziko ditu, eta hirugarrenak 200 euro. Gurutzatuetan bigarren postua lortzen duenak 100 euro jasoko ditu, eta hirugarrenak 75 euro. Era berean, gainontzeko parte hartzaileek ere diru saria jasoko dute.

Beste alde batetik, Txus Jaio markina-xemeindar piloto ezaguna, beste behin ere Karraspion ikuskizuna ematera aterako da. Iker Mintegia munitibartar moto gidaria izango du alboan. Jaio bere Mitsubishi-arekin eta Mintegia bere kart-crossarekin ariko dira. Dema politean neurtuko dira hondar gaineko zirkuitu ikusgarrian.

Antolatzaileek jakitera eman dutenez, aurten ere zozketa egingo dute. Hain zuzen, Leagi Jatetxean lau bazkari eta Mendexa Abentura Parkerako sarrerak zozkatuko dituzte. “Ikuskizuna prest dago, orain eguraldiak laguntzea behar dugu”, zehaztu dute antolatzaileek.