Jose Antonio Agirre Uskola da EH Bilduren alkategaia
"Herria egiteko" aurkezten da Mendexako EH Bildu, eta domeka eguerdian hautagaien zerrenda eta herri programa aurkeztuko dituzte.
Argazkia: EH Bildu Mendexa. Jose Antonio Agirre Uskola da Mendexako EH Bilduren alkategaia. Koalizioko kideek adierazi dutenez, herria egiteko aurkeztu dira: “Parte hartzean, auzolanean eta kohesioan oinarritutako funtzionamendua izango da gurea”.
Hala, domeka honetan [maiatzak 12] aurkeztuko dute herri programa. 13:00etan jarri dute ordua plazan, eta jai giroko aurkezpena izango dutela jakinarazi dute. Talde argazkia ere aterako dute, eta herritarrei bertaratzeko gonbidapena luzatu diete.
Ilusioa eta esperientzia dituen taldea osatu dutela azpimarratu dute. Lanerako zein harremanetarako taldea osatzea zen asmoa, eta lortu dutela azpimarratu dute: “Mendexa ondo ezagutzen dugun pertsonak gara; esparru, adin eta sentsibilitate desberdinetakoak , ta honek herriaren ikuspegi zabala ematen digu. Herria egitera gatoz, horretarako aurkezten gara, horren alde lan egitekotan”. Diotenez, herri kohesioa lortzea dute helburu, eta parte-hartzean, inklusioan eta auzolanean ardaztutako funtzionamendua izango da eurena: “Gure Herri programa ezin da ulertu herritarrik gabe, ez da proiektu itxi bat, malgua behar du izan, guztion artean aldatu eta egokitu behar dugulako. Herritarren proposamenak, kezkak eta beharrei erantzungo diegu, horretarako gatoz, guztiontzat lan egiteko, guztiokin lan egiteko”.
Esaterako, parte hartzea sustatzeko helburuagaz, batzorde eta plenoen “eraginkortasuna berreskuratzea” da euren apustua. Herritarrekiko komunikazio bideak ireki nahi dituzte, horien lehentasun eta ardurei erantzun egokia emateko. “Batzorde egonkorrak, pleno gehiago eta dekretu gutxiago, herri aldizkaria, herri galdeketa… hamaika tresna erabil daitezke erabakiak guztion artean hartzeko. Udaletxeko ateak zabalduko ditugu!”.
Zerrenda:
- Jose Antonio Agirre Uskola
- Alaitz Uskola Guenaga
- Juanjo Castrillo Perez
- Maribi Anakabe Aboitiz
- Jesus Maria Juaristi Arriaga
- Maria Jose Uriarte Lekerikabeaskoa
- David Muruaga Goikoetxea
Ordezkoak:
- Mertxe Lauzirika Zubillaga
- Amaia Rementeria Maruri
- Maria Jesus Altzibar Agirre
