Bizkaiko Trainerila Txapelketan Isuntza izan da onena, gazte mailan
Gizonezkoen absolutu mailan, Isuntza geratu da txapeldunorde eta Ondarru hirugarren. Emakumezkoetan, ostera, ondarrutarrek lortu dute zilarrezko domina eta Isuntzakoek brontzezkoa.
Argazkia: Bermeo Arraun Argazkiak. Bizkaiko Trainerila Txapelketa lehiatu dute asteburuan, Ondarroan. Zapatu arratsaldean lehiatutako sailkapen estropadetan, maila bakoitzetik bost talde sailkatu ziren finaletara, eta atzo lehiatu zituzten finalak. Bermeok irabazi zuen gizonezkoen absolutu mailakoa. Emakumezkoetan, berriz, Kaiku da aurtengo txapelduna eta mutilen gazte mailan Isuntza.
Hain zuzen, Lea-Artibaiko taldeek txapelketa bikaina burutu dute. Lekeitioko taldea hiru kategorietako podiumetan sartu da, eta ondarrutarrek lehiatu ohi dituzten bi kategorietan lortu dituzte dominak. Isuntza bigarrena izan da gizonezkoen absolutu mailan eta hirugarrena emakumezkoetan. Ondarru, ostera, emakumezkoetan txapeldunorde geratu da eta gizonezkoetan brontzezko domina eskuratu du.
Gazte mailan, Isuntza txapeldunagaz batera, Zierbenak eta Arkotek osatu zuten podiuma. Hamasei minutu, 25 segundo eta 57 ehunenetan burutu zuten estropada lekeitiarrek. 26 segundo eta 62 ehunenera sartu zen Zierbena, eta 38 segundo eta 57 ehunenera Arkote. Deustu eta Itsasoko Ama geratu ziren podiumetik kanpo.
Argazkia: Isuntzakoak zilarrezko dominekin. Bermeo Arraun Argazkiak.
Hamabost minutu, hamabi segundo eta 90 ehuneneko denboragaz nagusitu zen Bermeoko taldea, atzo. Zortzi segundo eta 26 ehunenera amaitu zuen Isuntza bigarrenak eta Ondarru izan zen hirugarrena, irabazlearengandik hamar segundo eta 42 ehunenera. Zierbena eta Itsasoko Ama sailkatu ziren ondoren.
Gizonezkoetan baino alde handiagoa egon zen emakumezkoen absolutu mailan, baina, halere minutu baten barruan sartu ziren lehen hirurak. 18:36.11 markatu zuen Kaikuk; 46 segundo eta 23 ehunenera sailkatu zen Ondarru, eta 56 segundo eta 23 ehunenera Isuntza. Lutxana eta Deustu sailkatu ziren laugarren eta bosgarren, hurrenez hurren.
Argazkia: Ondarrutarrak zilarrezko dominekin. Bermeo Arraun Argazkiak.
Euskadikoa. Bizkaikoaren ostean, Euskadiko Txapelketa lehiatuko dute asteburu honetan, eta hori ere Ondarroako uretan erabakiko da. Hain zuzen, zapatuan 16:30ean hasiko da sailkapen estropaden lehia (15:00ean egingo dute delegatuen batzarra, arrantzaleen kofradian), eta domekan, 11:00etatik aurrera lehiatuko dituzte finalak (09:30ean delegatuen batzarra).
