Euskal erromeriak egingo dituzte zapatuan, Mutrikun eta Lekeition
Mutrikun goizean egingo dituzte ekintzak, aurten ez delako nahiko jende animatu. Lekeition, ostera, goizean zein arratsaldean egingo dituzte ekintzak.
Dantzaria, iaz, Mutrikuko Euskal Erromerian. Mutrikun Gure Ametsa dantza taldeak antolatuta egingo dute Euskal Erromeria zapatuan [maiatzak 25]. Azken urteetan egun osoko jaia egin izan badute ere, aurten, jendea nahikoa motibatuta ez dutela ikusi eta jaia goizean egitea erabaki dute. Zehatz esateko, 12:00etatik 15:00etara egingo dira kalejirak eta dantzak, Goiko Plazan zein Beheko Plazan.
“Iaz lortu genuen jendea eta taldeak batzea. Aurten, baina, jaia goiz partera mugatzea erabaki dugu”, esan dute Gure Ametsa dantza taldeko kideek. Aurreko urteetan ere, arratsaldean Beheko Plazan egiten zen erromerian ez zuela jende askok parte hartzen esan dute. “Askotan plaza erdi hutsik geratzen zen, eta horretarako, hobeto ikusi dugu erromeriarik ez egitea”.
Erabakia hartzerakoan kontuan eduki dute baita ere egun horretan Mutriku Futbol Taldeko beteranoen partidua ere badagoela futbol zelaian. “Bestetik, egun osoko jaia izanda, batzuentzako luzeegi egiten zen, eta nahiz eta eguerdirako animatzen ziren, arratsaldean erretiratu egiten ziren”. Hala, aurten ez dagoela parte hartzeko aitzakirik esan dute, eta herritar guztiei kalera ateratzeko eta dantzekin eta dantzariekin giro ederrarekin gozatzera animatu nahi izan dituzte. “Atera daitezela kalera, eta ondo pasa dezatela”.
Zehaztu dutenez, 50 dantzari inguru izango dira herriko kaleak dantzekin jantziko dituztenak. Eta eguraldi txarra iragarrita badago ere, momentuz ez dutela ezer aldatzeko erabakirik hartu gaineratu dute. “Oso eguraldi txarra dago emanda, baina momentuz ez dugu beste planik pentsatu”.
Lekeition zapatuan [maiatzak 25] 12:00etan hasiko da kalejira, Merkatu Plazatik; dantzariak Txikirri-Txikirri taldeagaz aterako dira kalera. 18:30ean erromeria egongo da Independentzia plazan, Trikizio taldeagaz. Jaiagaz amaitzeko, 19:30ean Baigorriko Gaiteroen saioa egongo da, plazan baita ere.
