Hauteskunde eguneko irudiak eta kronika
Alkategai goiztiarrenak Aitor Odiaga (Markina-Xemeingo EH Bildu) eta Maria Dolores Etxano (Ondarroako EAJ) izan dira. Gehienek 12:00ak eta 13:00ak artean bozkatu dute. HITZAk jakin ahal izan duenera arte, momentuz ez da ezer berezirik gertatu.
Mutrikuarrak, Zabieleko hautesmahai batean botoa ematen. Hauteslekuak zabaldu eta herritarrak tantaka hasi dira agertzen. Hauteskunde egunetan gertatu modura, 12:00ak aldera izan da jende gehien batu den momentua. Lea-Artibai eta Mutrikuko alkategai gehienek ere goizean eman dute botoa.
Aitor Odiaga Markina-Xemeingo EH Bilduren alkategaia izan da lehenengotakoa; 11:00etarako hurreratu da botoa ematera. Maria Dolores Etxano Varela Ondarrroako EAJren alkategaiak ere ordu berean eman du botoa, Ondarroako Udal Erakusketa Aretoan. Alberto Garro Ziortza-Bolibarko EH Bilduren alkategaiak Eibarren bozkatu du, 11:30ean.
Joseba Palenzuela Mutrikuko EH Bilduren alkategaiak 11:45ean bozkatu du, eta Jose Angel Lizardi Mutrikuko EAJren alkategaiak 12:20an. Lekeition, Miren Tere Aboitiz EH Bilduren alkategaiak ere 12:00etan bozkatu du, eta 12:30ak aldera Koldo Goitia EAJren alkategaiak. Luis Egurrola Markina-Xemeingo EAJren alkategaiak ere 12:00etan eman du botoa.
Berriatuko bi alkategaiek 13:00etan bozkatu dute; Jon Arriolak (EH Bildu) bozkatu du lehendabizi, eta Eneritz Bilbatuak (EAJ) jarraian. Ordu horren bueltan bozkatu du Jone Antsotegi Aulestiko EH Bilduren alkategaiak ere.
Gizaburuagako Ibaibaso herri hautagaitzako ordezkariek ere 13:00ak bueltan eman dute botoa; herri hautagaitzako zerrendako batzuek une berean bozkatu dute.
Etxebarrian 14:30ean eman du botoa Jesus Iriondo Lejardi Etxebarriko EAJren alkategaiak. Ordu horretarako 300 herritar baino gehiagok emanda zeukan botoa udaletxeko mahaian.
Zunbeltz Bedialauneta Ibaibarriaga Ondarroako EH Bilduren alkategaiak bazkalostean bozkatu du, 15:40an. Goizean herrian lehiatu den Euskadiko Trainerila Txapelketan egon da.
Iratxe Pikaza Ziortza-Bolibarko EAJren hautagaia mahaian egon da, eta, ondorioz, azken momentuan eman du botoa.
Ostera antzean, ez da gorabeherarik egon, eta HITZAk jakin ahal izan duenera arte, mahaien osaketan ere ez da ezer berezirik gertatu.
OHARRA: informazioa eguneratzen joango gara. Eta 20:00etatik aurrera minutuz minutuko jarraipena sare sozialen (Twitter eta Facebook) eta webgunean.
