Umeentzako esperimentu tailerra antolatu du Ondarroako Bixikan elkarteak
Bixikan elkarteak 4 eta 7 urte bitarteko umeei zuzendutako esperimentu tailerra egingo du ekainaren 13an eta 20an. Saio bat zein bestea 18:30ean hasiko dira Bixikaneko lokalean.
Parte hartu nahi dutenek ekainaren 2a aurretik eman beharko dute izena bixikan@gmail.com helbide elektronikora idatzita. “Izena ematerakoan zein saiotara joateko interesa duten zehaztu beharko da. Herri guztiari zabaldutako ekimena da; parte hartzeko ez dago zertan Bixikaneko bazkidea izan. “.
Gogorarazi dutenez, umeek nagusi batek lagunduta joan behar dute,eta saio bakoitzean, gehienez, 15 laguneko taldeak osatuko dira. Jende gehiagok izena ematen badu, zozketa egingo dutela aurreratu dute elkarteko kideek.
Bertaratzen diren umeek zientzia hezkuntzan aditua den Danel Solabarrieta ondarrutarraren eskutik hainbat esperimentu zientifiko egiteko aukera edukiko dute era erraz eta dibertigarrian. “Gure asmoa zientzia umeengana hurreratzea da”. Tailerra, gainera, hirugarrenez antolatu dute. “Urtero esperimentu desberdindak egiten ditugu, eta oso dibertigarria da. Aurreko bietan sekulako arrakasta izan du, eta esperientzia errepikatzea erabaki dugu oraingoan ere”.
