Arrain Bideko festa egingo dute Mutrikuko Laranga auzoan
Arrain Bide Festa hamalaugarrenez egingo dute zapatuan [ekainak 22]. Esku pilota txapelketa, jokoak, bazkaria eta mus txapelketa antolatu dituzte aukeran. Auzotarrak eta herritarrak jaiaz gozatzera gonbidatu dituzte.
09:00etan hasita, auzoko Binakako Esku Pilota Txapelketa jokoan egongo da Pikua landetxearen atzeko frontoian. Izen ematea 09:00etan zabalduko dute, eta 09:15ean, berriz, izena emanda daudenen artean bikoteak osatuko dituzte zozketa bidez. Kanporaketak jokatu ostean, finala jokatuko dute, 12:00etan.
12:30ean, berriz, jokoak egingo dituzte frontoian bertan. Besteak beste, karabinarekin tiroan edo futbolin erraldoian parte hartzeko aukera izango dute bertaratzen direnek. Bateko eta besteko jolasak probatu eta gero, 14:30ean, auzotarren bazkaria egingo dute Pikuan. “Urtero 40 bat lagun batzen gara. Bazkarira etorri nahi duenak barikura [ekainak 21] arte izena emateko aukera edukiko du Pikua landetxean edo 629 10 57 33 telefonora deituta”. Azkenik, 17:00etan, mus txapelketa egingo dute. Parte hartzaileek momentuan bertan eman beharko dute izena. “Txapelketa bikoteka izango da, eta azken txanpa, banaka”.
