Herritarrak Ondarroako Akelarrean parte hartzera gonbidatu dituzte
Hitzordua 22:00etan ipini dute, Arrigorri hondartzaren inguruan. Parte hartu nahi duten herritarrei Erdi Aroko arropekin jantzita agertzeko eskatu diete.
Ondarroako Artelan Kultur Elkarteak, ohi modura, Akelarrea egingo du San Joan bezperan [ekainak 23]. Eta bertan parte hartu nahi duten herritarrak ongi etorriak izango direla agertu dute elkarteko arduradunek. Parte hartu nahi dutenei, urtero legez, Erdi Aroko arropekin jantzita agertzeko eskatu diete. Arroparik ez duenak ere parte hartzera animatu dituzte parte hartzaileek, “bertan egongo dira denentzako arropa eta margozteko materiala”.
Hitzordua 22:00etan ipini dute Arrigorri hondartzaren inguruan. Jantzi, margotu eta gauerdirako dotore ipintzen ibiliko dira. Gauerdian bolanderak jaurti ondoren, Arrigorri bihurgunetik behera kalejiran joango dira Musika Plazarantz. Eta han sua piztu ondoren, suaren inguruan dantzan eta kantuan batuko dira herritarrak.
