Zabalik dago Mutrikuko Gazte Robotika tailerrean parte hartzeko izen ematea
Tailerra Zabiel kultur etxeko ganbaran emango dute, abuztuaren 26tik 30era, eta bertan 2004 eta 2011 urten jaiotako gaztetxoek parte hartu ahal izango dute. Iazko tailerretan parte hartu zutenek ere parte hartu ahal izango dute.
Iazko udan edukitako harrera bikainaren ostean, Gazte Robotika egitasmoak aurten ere robotika sorkuntza tailerrak eskainiko ditu Mutrikun. Tailerrak 20 orduko iraupena edukiko du, eta Mutrikuko Zabiel kultur etxeko ganbaran emango dute, abuztuaren 26tik 30era. Izen ematea zabalik dago honako webgunean. “Udalak diruz lagundutako tailerrak dira, eta parte hartzaileek 30 euro ordaindu beharko dituzte”. Gogorarazi dutenez, plaza mugatuak dira.
Mutrikuko Udal Garapen Sailak eta Debegesa Debabarreneko Garapen Ekonomikorako Elkarteak bultzatu dute elkarlanean Gazte Robotika hezkuntza egitasmoa, eta aurreratu dutenez, tailerrean 2004 eta 2011 urteen jaiotako gaztetxoek parte hartu ahal izango dute. “Talde lana sustatuz, gaztetxoek teknologiarekin ikasi, eta ondo pasatzeko aukera izango dute euren robot propioak sortuz eta programatuz”.
Robotika alorrean Lego Mindstorms EV3 plataformarekin egingo dute lan. Berritasunen artean, joko edota erronka berriak diseinatu dituzte, gaztetxoek euren proiektuetan aplika ditzaten. Azpimarratu dutenez, iazko tailerretan parte hartu zutenek ere parte hartu ahal izango dute, eta ikasten jarraitu, sormena landuz eta konponbide teknologiko berritzaileak garatuz. Erronkei buruzko informazio gehigarria Gazte Robotika egitasmoaren webgunean kontsultatu ahal izango da. “Aukeran Space, Rally, 1vs1 edo Rescue erronken artean hautatu ahal izango dute”.
Gainera, tailerretan euren proiektuak diseinatu eta garatu ostean, irailaren 28an Elgoibarren egingo den Euskadiko 3. Hezkuntza Robotika Txapelketan parte hartzeko aukera izango dute, doan. “Tailerretan parte hartzea eta lehiaketan parte hartzea ez dira sinonimo. Erronka berdinak prestatuko ditugu, eta gaztetxoak txapelketan ere parte hartzera animatuko ditugu, baina lehiaketan parte hartzea erabat borondatezkoa izango da”.
