Lehen euskal muskuilu marka aurkeztu du Matxitxako Moluskuak enpresak: Amarra
Iaz martxan jarri zuten Mendexako Akuikultura Parkea moskuiluak hazteko hamabi plataforma horizontalek (longline) osatzen dute, eta, aurten, 100 tona muskuilu ekoiztea espero dute arduradunek.
Arantxa Tapia, Txomin Lasarte, Iñigo Urkullu eta Koldo Goitia, mutxiloiak dastatzen. Amarra Bizkai, Gizpuzkoa eta Arabako lehen muskuilu marka aurkeztu dute gaur goizean [uztailak 3], Lekeition. Mendexako Akuikultura Parkean Matxitxako Moluskoak enpresak ekoiztuta, datozen asteetan iritsiko da Euskal Herriko taberna, arraindegi eta supermerkatuetara.
Aurkezpen ekitaldira Iñigo Urkullu Eusko Jaurlaritzako lehendakaria, Arantxa Tapia Ekonomia Garapeneko eta Azpiegituretako sailburua, Koldo Goitia Lekeitioko alkatea, Pedro Zenigaonaindia Badiola Mendexako alkatea eta Txomin Lasarte Matxitxako Moluskuak enpresako ordezkaria bertaratu dira besteak beste, eta Mendexan eraiki duten akuikultura parkea bisitatu dute bertatik bertara.
Aspalditik ezagutzen duen proiektua izanik, Goitiak esker hitzak izan ditu elkarlanean arrantza sektorearen dibertsifikazioaren alde lan egiten dabiltzan enpresa eta erakundeentzat: “Ohorea da proiektu honen aurkezpenean egotea. Aspaldidanik daramagu dibertsifikazio proiektuen bila, eta badakit kostaldeko herri askorentzat ere aukera paregabea dela honako hau”.
Instalakuntza berezia. Mendexako Akuikultura Parkea mundu mailan itsaso zabalean dagoen instalakuntza bakanenetarikoa dela azaldu du Lasartek, eta “Kantauri itsasoan bakarra”. Muskuiluak hazteko hamabi plataforma horizontalek (longline) osatutako parkea iaz eraiki zuten, eta “egoera gogorrenei aurre egiteko bereziki diseinatuta” dago. Longline bakoitzak 130 metrotako 100 soka bertikal ditu eta 250 kilo jasan ditzake. “Instalakuntza berezi honi esker 100 tonako ekoizpena lortzea espero dugu aurten, eta datozen lauzpabost urteetarako 500 edo 600 tona aurreikusten ditugu. Moluskuez gain, ostrak ere ekoitzi nahi ditugu etorkizunean”.
Baina nolakoak dira Mendexako Akuikultura Parkean batzen ari diren muskuiluak? Lasarteren hitzetan, “muskuilua oso berezia da, itsas-zaporea duena, eta testura atseginekoa. Gure kostaldeko ur puruek ahalbidetzen dute horrela izatea, eta ekoizpen ekologikokoaren baldintzak betetzen ditu”.
Elkarlana oinarri. 2014. urtean ekin zion Eusko jaurlaritzak akuikultura bultzatzeko plangintza estrategikoa martxan jartzeari. “Arrantza sektoreak mugugak baditu ere, gero eta arrain gehiago kontsumitzen dugu, horregatik, akuikulturak ere garrantzia gehiago dauka gizartean. Hala, industria arlotik hasitako proiektuei laguntzak emateko asmoz, azpiegitura berriak abian jarri genituen. Gaur aurkezten dugun hau da emaitza adierazgarriena”, adierazi du Urkulluk. “Euskal arrantzaleak aitzindariak izan ziren iraganean, eta proiektu hau akuikultura indartzen eta zabaltzen jarraitzeko aitzindaria izango da gure artean”.
Azken bost urteetan garatu duten proiektua lehiakortasunaren aldeko apustua izan dela azpimarratu du lehendakariak, eta lau helburu kontuan izanda elkarlanean aritu dira Azti Teknologia-zentroarekin eta Matxitxako Moluskuak enpresarekin: “Itsasoak eskainzten dizkigun baliabideak gordetzea, arrantzari lotutako ekonomiaren jasangarritasuna bermatzea, ingurugiroarekin oreka mantentzea, eta enpresa munduari balio erantsia eskainztea”. Arrantzak Euskadin zuzeneko 2.400 lanpostu eta zeharkako 10 mila sustatzen dituela ere gogorarazi du Urkulluk.
Matxitxako Moluskuak. Besteak beste, Lekeitioko eta Ondarroako kofradiek, Arrankobak eta Itsaskordak sortu zuten Matxitxako Moluskuak enpresa 2015. urtean, eta sustengarritasunaren aldeko apustu garbia egin dute ordutik. Azti zentroak bultzatutako ikerketetatik abiatuta jaio zen, eta Eusko Jaurlaritzak emandako aukera baliatu zuten jasangarritasunari eta lehiakortasunari begira lan eginez.
