Musika izango da Amorotoko jaietako protagonista nagusia
Txan Txun Txun panpinak irakurriko du aurten pregoia udaletxeko balkoian, eta herriko dantza taldeko Lander Arriagak jaurtiko du txupina.
Herritarrak, iazko paella janean. Uda iristearekin batera, herriz herri eta jairik jai parranda giroan murgiltzen dira gazte asko. Eta jai ospetsurik baldin badago, uztaila hasiera honetan batez ere, Amorotoko San Martin jaiak dira. Gaur hasi eta domekara bitartean, herrira jende asko hurbilduko dela aurreikusi du Ibon Gabiola Amorotoko alkateak. Txupina 20:00etan jaurtiko dute udaletxeko balkoitik, eta Txan Txun Txun panpinari ongi etorria emanez hasiko dituzte jaiak. «Azken urteetan indarra hartu duen ekimena da, eta bizilagunek gogo handiz itxaroten dute», baieztatu du Gabiolak.
Txan Txun Txunek berak irakurriko du pregoia, eta herriko dantza taldeko Lander Arriagak jaurtiko du txupina. «Aurreko urteko jai bukaeran erabaki ohi da hurrengo urtean nor izango den txupina jaurtiko duena». Ostean, aldiz, musikak alaituko du Amorotoko plaza, Gozategi erromeriak lehenik, eta DJ Bullek gero. Biharko, San Martin egunerako, gaztetxoenentzako zein nagusientzako egitaraua prestatu dute antolatzaileek. Mezaren ondoren, Arta-Nagusi dantza taldearen saioaz gozatzeko aukera izango dute herrian.
Arratsaldean, aldiz, umeek puzgarriekin jolasteko gunea izango dute, baita apar jaiaz disfrutatzeko tartea ere. Iluntzean, berriz, mariatxien emanaldia egongo da. «Puro Relajo taldea ekarri dugu, batez ere nagusiengan pentsatuz. Orokorrean oso egun lasaia izango da biharkoa, barikutik aurrera baitator benetako martxa», azaldu du Gabiolak. Asteburu jendetsua Kontzertuen egunak erakartzen du urtero jende gehien herrira.
Bariku gauean [uztailaren 5a] inguruko herrietako gazteak frontoian elkartzen dira sasoiko musika talde arrakastatsuenak entzuteko asmoz. Aurten, Huntzak, Nikotinak eta Maconakek emango dituzte kontzertuak, eta bost euro ordaindu beharko dituzte zaletuek. Ostean Bide Batez erromeriak eskainiko du emanaldia. «Sortzen den giroa paregabea izaten da», azaldu du alkateak.
Hitzordu nagusia musikarekin lotutakoa bada ere, aurretik, desafio «eder» bat lehiatuko dute Amorotoko eta Mendaroko herritarrek. Kotxe bati tiraka Amoroton gora igo beharko dute batean zein bestean sortu dituzten talde brezietako kideek. «Taberna giroan sortu ohi diren desafioen antzekoa da. Mendaroarrek era honetako erronkak asko egiten dituzte, eta guk ere gurean talde bat sortu dugu propio». Elkarrekin ondo pasatzeko jarduera bat da: «Lagunarteko desafioa da, eta oroigarri sinboliko bat emango diegu irabazleei. Ostean afaltzera joango dira bi taldeetako kideak». Zapatua [uztailaren 6a] izango da amorotarren «egun handia»,
Herritarren Eguna. Kuadrillek paellak egingo dituzte 12:30etik aurrera, izan ere, herritarrak elkartzeko aitzakia paregabea da urtero antolatzen duten lehiaketa. Ostean, 15:00etan, «kuadrillen eta hirugarren adinekoen bazkari herrikoia» egingo dute plazan. «Antolatzen dugun laugarren urtea da. Herritarrei omenaldia egiten die ekimen honek», gogorarazi du Gabiolak. Hala, bazkalosterako, «arratsaldea animatzeko moduko jolasak» prestatu dituzte, horretarako, hiru talde sortuz: lehena amorotarrek osatutakoa, bigarrena Amorototik irten eta beste herrietara bizitzera joan direnek osatutakoa, eta azkenik, etorkinen taldea. Helburua harremanak sendotzea dela dio alkateak.
Domekan [uztailaren 7a], San Martin jaien azken egunean, Mus eta Briska txapelketak jokatuko dituzte herritarrek, arratsaldean. Izena partidak jokatu baino ordu laurden lehenagora arte eman beharko dute interesatuek: 15 euro bikote bakoitzak musean aritzeko, eta 10 euro briskarako. Irabazleek txapela jasoko dute oparitan.
Gababusak. Barikuan, Lea-Artibaiko herrietatik autobus zerbitzu bereziak egongo dira martxan Amorotora hurbiltzeko. Txartelak udaletxeetan eskuratu beharko dituzte interesatuek. Bestalde, Lekeitio eta Amoroto arteko zerbitzua ere egongo da, 21:00etatik 07:00etara egingo ditu autobusak joan-etorriak. Gaur eta zapatuan, Amoroto Lekeitio eta Markina-Xemeinekin lotuko dituen autobusak egongo dira: 21:30 eta 22:30ean Lekeitiotik; 21:00etan Markina-Xemeindik. Itzulerako autobusak Lekeitiora bidean joango dira 04:00etan eta 06:30ean; 05:00etan Markina-Xemeinera.
