Zaintza lanak partekatzeko aldarrikapena egin dute Ondarroako Arnasa Egunean
Fibrosi kistikoa dutenen eta horien senideen aldeko jaia giro onean egin dute Ondarroan. Andrabadako kideek irakurri dute pregoia, eta fibrosi kistikoa dutenen zaintza ez dela bakarrik emakumeen ardura esan dute.
Herritarrak Asisko Urmenetagaz. Iragarri bezala, Artelan kultur elkarteko erraldoi eta buruhandien eta Andrabandaren danbor hotsagaz hasi da Arnasa Eguna Ondarroan. 11:30ean hasi da kalejira, Zubi Barritik, eta Alamedaraino ailegatu dira. Alamedan Arnasa elkartearen kamisetak saltzeko postuak zeuden, eta batera eta bestera zebiltzan umeak zozketa erraldoirako txartelak saltzen.
Besteren artean, jendartea sentsibilizatzeko egiten da Arnasa Eguna. Eta bozgorailuetatik behin eta berriro errepikatu dute gaixotasun hori edukitzeak zer suposatzen duen, gaixoarentzat berarentzat eta baita ere senideentzat. Bide horretatik, Andrabandakoek zaintza lanen garrantzia azpimarratu eta lan hori partekatzeko eta bakarrik emakumeen gainean ez egoteko aldarria egin dute. Aldarri hori, hain zuzen ere, pregoian egin dute. Kirmen Uribek ere idatzia bidali du, eta Begoña Anakabek irakurri du haren mezua. Besteak beste, Uribek eguneko ekintzen errepasoa eta ospakizunaren zergatia uztartu ditu espreski egun horretarako idatzitako poesian.
Ostean Garazi Etxaburuk dantza emanaldia eskaini du, txalapartariek lagunduta. Hortik aurrera ekintzak izan dira protagonista. Umeek aurpegiak margotu bitartean, nagusiek sardina erreak eta txorizoa jateko aukera eduki dute. Alamedako txoko guztien artean Asisko Urmeneta komikigilearena izan da bisitatuena. Ume zein nagusiak jarri dira marrazkilariaren aurrean, eta Urmenetak marraztu egin ditu. Jaiak, baina, ez du etenik eduki, gauera arte.
Honakoak dira zozketako zenbaki saridunak:
- Opari sorta: 7974
- Kukai dantza taldearen ikuskizuna ikusteko sarrerak: 8974
- Bilboko Kafe Antzokirako kontzertu baterako lau sarrera: 2833
- Bilboko Kafe Antzokirako kontzertu baterako bi sarrera: 8302
- Guggenhemi museorako sarrerak: 4333
- Bilboko esku pilota txapelketako finalerako bi sarrera: 5066
- Sutraiko produktu sorta: 3230
- Opari sorta: 8170
- Azpeitiko errekortariak ikusteko lau sarrera: 0971
- Azpeitiko errekortariak ikusteko bi sarrera: 3102
- Sutargi jatetxean afaria/bazkaria: 2621
