Gazteak izan dira Mutrikuko Malen bezperako protagonista nagusiak
Malenetako festa giroa aurreko egunetan berotzen hasi badira ere, gaur [uztailak 21] murgildu dira ofizialki jaietan mutrikuarrak. Gaur, hain zuzen ere, Malen bezpera edo Gazte Eguna ospatu dute goi-goitik.
Herri bazkarian parte hartu duten hainbat gazte, Beheko Plazan Eguerdi paretik hasita, herriko gazteak euren eguna ospatzen ibili dira, Ahal danian, dana ematen da, eta ezin danian, ahal dena lelodun kamiseta berdeak soinean. Gaztetxe aurrean topaketa egin dute elektrotxarangak lagunduta, eta handik Beheko Plazara abiatu dira jaiarekin bat egin dute lehen gazteek.
Eguerdiko lehen orduetan gazte askorik batu ez bada ere, bazkalaurretik egin duten poteoan gero eta gazte gehiago batzen joan da, Beheko Plazan eta inguruetan batutako marea berdea handituz. Merkatu Plazan bazkaltzera abiatu aurretik, eta urteroko ohiturei jarraituz, dozenaka kuadrillek argazki erraldoia atera dute txosnagunean. 250 lagun inguru batu dira paella janean.
Portuan, ostera, bestelako proposamenerakin gozatzeko aukera ere egon da. Itsasoko zaborraren arazoari buruzko kontzientzia areagotzea eta herritarrak prebentzioan inplikatzea helburu duen Mater ontzi museoa portuan lotuta egon da azken egunotan, eta ikusmin handia eragin du herritarren artean. Nahi izan dutenek doako bisita gidatuak egiteko aukera eduki dute ordu erditik behin. Alboan ipinitako erakusmahaian, gainera, arazoa agerian lagatzen duten hainbat tailer eta jarduera egiteko aukera ere egon da.
Arratsaldean, berriz, Malen jaiei hasiera ofiziala eman dien itxaplerua jaurti dute Goiko Plazatik. Eta behin suziria jaurtita, Erraldoi eta Buruhandien Konpartsako kideak jai giroa herri guztian zabaltzen ibili dira, txistulariek lagunduta.
Ohi modura, Malen bezpera danborrarekin agurtuko dute. 23:00ak inguruan danbor joleek Goiko Plazatik Beheko Plazarako bidean hasiko dira, eta gauerdian amaituko dute ekimena, Mutriku herria joaz eta abestuaz. EMAko kideak ere gauerdian omenduko dituzte txosnagunean, eta jaietako bigarren txupina piztu ondoren, 60 bat emakumez osatutako batukada abiatuako da kalez kale.
