Europako Lur Gaineko Sokatira Txapelketan ariko da Mutriku
Irlandako Castlebar hirian jokatuko da txapelketa. Europako txapelketaz gain, Munduko txapelketa ere jokatuko da gazte eta 23 urtez azpiko mailetan. Astelehenean [irailak 2] tiratzaileen omenezko ekitaldia egingo dute Mutrikun, Irlandarantz abiatzeko egunaren bezperan.
Mutriku Sokatira Taldea. Argazkia: Mutriku Sokatira Taldea Txapelketa irailaren 4tik 8ra bitartean jokatuko da. Mutriku Sokatira Taldekoek nagusi mailako Europako Lur Gaineko Sokatira Txapelketaren hiru kategoriatan parte hartuko dute: gizonezkoen 680 kilokoan, 640 kilokoan eta 560 kilokoan. “Hiru kategoriatan izena eman baldin badugu ere, 680 kilokoan, ziurrenik, kale egin beharko dugu. Getxoko taldekoek 580 kiloko mistoan jendea behar dute, eta litekeena da gure taldekide bat edo bi behar izatea taldea osatzeko. Hala bada, ez dugu 680 kilokoan parte hartuko”.
Lau euskal taldek parte hartuko dute lehian. Mutrikurekin batera, Gaztedi, Goiherri eta Getxo nor baino nor indartsuago ariko dira Frantzia, Belgika, Suitza, Letonia, Holanda, Italia, Ipar Irlanda, Eskozia, Gales, Irlanda, Ingalaterra, Polonia, Alemania, Israel, Suedia eta Txekiar Errepublikako hainbat talderen aurka.
Lehia eguenean [irailak 5] hasiko da, baina aurretik talde guztiek pisaketa egin beharko dute eguaztenean [irailak 4]. 110 lagun inguruk osatutako euskal delegazioa martitzenean [irailak 3] abiatuko da Irlandara. Tartean, txapelketan jardungo duten bi euskal epaile ere egongo dira: Jose Maria Markaida eta Jose Antonio Uriarte, Nazioarteko Sokatira Federazioak deituta ariko dira.
Javier Urresti Mutrikuko Sokatira Taldeko kideak azaldu duenez, zortzi tiratzaile, entrenatzailea eta taldeko laguntzailea abiatuko dira Irlandarantz,”besteak ez dira etorriko”. Honako tiratzaileak ariko dira Sebastian Gurrutxaga Agirre Loreto nuarbetarraren esanatera: Patxi Ituarte Salegi eta Garikoitz Arruti Agirregabiria mutrikuarrak, Javier Urresti Quinteiro eta Iker Goikoetxea Malasetxebarria ondarrutarrak, Xuban Muniozguren Arrate eta Ekaitz Salcedo Muñiz markina-xemeindarrak, Unai Goitia Goitiandia aulestiarra eta Raul Bilbao Iturri getxoztarra. “Rebeca Dominguez gu laguntzera etorriko da”.
Irlandarantz abiatu aurretik, baina, euren omenezko ekitaldi xumea egingo dute astelehenean [irailak 2] Mutrikuko udaletxeko areto nagusian. 19:30ean ipini dute hitzordua. “Orain arte sariren bat lortuz gero egin izan diegu harrera, txapelketatik bueltan. Aurtengoan, berriz, aurretik herritarren babesa eta animoak jasotzeko ekitaldi bat antolatzea erabaki dugu”, azaldu dute mutrikuko udal ordezkariek.
Mutrikuarrei dagokionez, eguenean [irailak 5] 680 kiloko eta 560 kiloko kategorietan lehiatuko dira. Goizean, 680 kilokoan, eta arratsaldean, berriz, 560koan. Barikuan [irailak 6] arratsaldean, berriz, 640 kilokoan ariko dira.
Kluben arteko bi egunetako txapelketaren ondoren, Nazioen arteko nagusi mailako Europako Txapelketa eta Gazte eta 23 urtez azpiko Munduko Txapelketak ere jokatuko dira asteburuan [irailak 7 eta 8]. Eta Urrestik aurreratu duenez, Euskal Herriko selekzioagaz ere parte hartuko dute mutrikuko tiratzaileek.
Taldeak aurten sekulako denboraldia egin du. “Esperotakoa baino hobeto ibili gara”. 680 kiloko gizonezkoen kategorian, esate baterako, 2. postuan amaitu dute, eta, hori dela eta, kategoria horretan eurek ordezkatuko dute Euskal Herria. “Gure taldeko laurek egingo dugu tira Goiherriko beste laurekin batera”. 720 kiloko gizonezkoen kategorian ere parte hartuko dute taldeko hiru kidek, Goiherriko laurekin eta Gaztediko kide batekin batera. “Unai Goitiak eta Xuban Muniozgurenek, aldiz, Munduko Txapelketa jokatzera deitu dituzte 23 urtez azpiko selekzioarekin”.
